कञ्चनपुरको भीमदत्त नगरपालिकाको महेन्द्रनगरस्थित महाकाली अस्पतालमा समेत कोरोना संक्रमित बिरामीहरूको संख्या बढ्न थालेको छ ।

उक्त अस्पतालका कोभिड फोकल पर्सन डा. गोविद रोकायाका अनुसार ५० बेडको क्षमता रहेको उक्त अस्पतालमा शुक्रवारसम्म ३८ जना संक्रमितहरू भर्ना भएका छन् ।

उक्त अस्पतालमा भेन्टिलेटरसहितको ६ वटा शय्या रहेकोमा सबै शय्यामा बिरामी भर्ना छन् ।

त्यसैगरी भेन्टीलेटरबाहेक अक्सिजन आपूर्ति गर्ने सिलिन्डरसहितको हाई डिपेन्डेन्सी युनिट (एचडीयू) मा समेत १५ जना भर्ना भएका छन् ।

'सिकिस्त तथा लक्षण देखिएका बिरामीहरूई उक्त वार्डमा भर्ना गरेर उपचार गरिरहेका छौं,' रोकायाले भने, 'बाँकी लक्षण नदेखिने बिरामीलाई नर्मल वार्डमा भर्ना गरेर उपचार गरेका छौं ।'

एक जना अति नै सिकिस्त बिरामीलाई १ हजार क्षमताको अक्सिजन आपूर्ति गर्दा पनि अक्सिजन अभाव देखिएपछि आजै धनगढी रेफर गरिएको उनले बताए ।

मुख्य गरेर स्वासमा समस्या हुने र ज्वरो लागेका बिरामीहरू बढी आउने गरेको उनले बताए ।

'अहिले अस्पतालमा नै अक्सिजन प्लान्ट स्थापना गरिएको हुनाले अहिले तत्काल अक्सिजन सिलिन्डरको अभाव देखिएको छैन,' उनले भने, 'तर संक्रमित बिरामीको संख्या बढ्दै गयो भने अभाव हुन सक्छ ।'