नेकपा (माओवादी केन्द्र) छाडेर एमालेमा लागेका राष्ट्रिय सभा सदस्य चन्द्रबहादुर खड्कालाई पनि माओवादी केन्द्रले कारवाही गरेको छ ।

उनलाई सांसद पदबाट पदमुक्त गर्ने पत्र राष्ट्रिय सभा सचिवालयमा बुझाउन माओवादीले राष्ट्रिय सभा संसदीय दलका नेता दिनानाथ शर्मालाई जिम्मेवारी दिएको छ ।

राष्ट्रिय सभा सदस्य चन्द्रबहादुर खड्का दल त्याग गरी अन्य दलमा प्रवेश गरेकाले निज चन्द्रबहादुर खड्कालाई दल त्यागसम्बन्धी कारवाही गर्ने भनी दलले दिएको अख्तियारी बमोजिम पार्टीका अध्यक्ष पुष्पकमल दाहाल 'प्रचण्ड'बाट २०७८/०१/१० मा निर्णय भएको छ,' शर्मालाई माओवादी केन्द्रले दिएको पत्रमा भनिएको छ ।

खड्काले दल त्याग गरेको सूचना माओवादीले राष्ट्रिय सभा सचिवालयमा दिएपछि उनी पदमुक्त हुने प्रक्रिया शुरू हुनेछ ।

दलले दिएको सूचना, सूचना पत्रमा प्रकाशित भएमा वा बैठकमा पेश गरेमा पदमुक्त हुने व्यवस्था छ ।