भारतको पश्चिम बंगाल विधानसभा निर्वाचनमा तृणमूल कांग्रेसलाई प्रचण्ड विजय दिलाएपछि पार्टी प्रमुख ममता बनर्जीले बुधवार मुख्यमन्त्रीको शपथ लिएकी छन् । 

शपथ लिएपछिको सम्बोधनमा ममताले राज्यमा जारी हिंसाका विषयमा कडा सन्देश दिइन् । हिंसा फैलाउनेहरूमाथि कडा कारवाही गरिने उनले बताइन् । हिंसाको घटनालाई कुनै हालतमा नसहने उनको भनाइ छ । 

त्यसअघि राजभवनमा शपथ ग्रहण समारोहमा ममता बनर्जी र राज्यपाल जगदीप धनखडबीचको अनबन स्पष्ट झल्कियो । राज्यपालले बधाई सम्बोधनमा ममतालाई हिंसाको विषयमा सचेत गराए । राज्यमा विधिको शासन लागू गरिनुपर्ने र राज्य सरकारले प्राथमिकताका साथ हिंसा रोक्नुपर्ने उनले बताए । 

त्यसपछि ममताले भर्खर मुख्यमन्त्री पदको शपथ लिएको र नयाँ ढंगबाट पूरा व्यवस्थालाई ठीक पार्ने बताइन् । आफ्नो प्राथमिकता कोभिड व्यवस्थापन भएको र त्यसपछि शान्तिबहाली पनि भएको उनले बताइन् । यसका लागि वरिष्ठ अधिकारीहरूसँग बैठक गर्ने पनि उनको भनाइ छ ।

सन् २०१९ मा राज्यपाल बनेदेखि जगदीप र ममताबीच अनबनको स्थिति छ ।