१३५ शय्याको कोरोना वार्ड बनाएर संक्रमितको उपचार गराइरहेको बाँकेको नेपालगञ्ज मेडिकल कलेज कोहलपुरले सरकारले अक्सिजनको व्यवस्था नमिलाए कोरोनाका थप बिरामीको उपचार गर्न नसक्ने घोषणा गरेको छ ।

कोरोना संक्रमण तीव्र रूपमा बढ्दा अक्सिजनको चरम अभाव भएको र भारतबाट अक्सिजन आपूर्ति हुन नसकेका कारण थप संक्रमित भर्ना गर्न नसक्ने चेतावनी अस्पतालले दिएको छ ।

नेपाल मेडिकल कलेजका प्रबन्ध सञ्चालक डा. सुरेशकुमार कनोडियाले बुधवार एक प्रेस विज्ञप्ति प्रकाशित गर्दै लिक्विड अक्सिजन ट्यांक सकिएको र भारतबाट आउन नसकेकाले शिक्षण अस्पतालले हाल उपचार गराइरहेकाबाहेक थप कोरोनाका बिरामी भर्ना गर्न असमर्थ रहेको जनाएका छन् ।

शिक्षण अस्पतालले ३ दिनअघि आपतकालीन बाहेकका अन्य उपचार बन्द गरेर ३०० शय्यासम्मको कोभिड अस्पताल सञ्चालन गर्ने घोषणा गरेको थियो ।

‘अस्पतालमा लिक्विड अक्सिजन ट्यांक, पीएसए अक्सिजन प्लान्ट तथा अक्सिजन सिलिन्डरबाट कोभिडका बिरामीको उपचार भइरहेको थियो । सबैभन्दा भरपर्दो लिक्विड अक्सिजन ट्यांक सकिएको र भारतबाट आउन नसकेकाले यस शिक्षण अस्पतालले हाल उपचार गराइरहेकाबाहेक थप कोरोनाका बिरामी भर्ना गर्न असमर्थ रहेको कुरा दुःखका साथ सार्वजनिक रूपमा सबैलाई जानकारी गराउन चाहन्छौं,’ डा. कनोडियाले विज्ञप्तिमा उल्लेख गरेका छन् ।

शिक्षण अस्पतालमा लुम्बिनी, कर्णाली र सुदूरपश्चिम प्रदेशका समेत कोरोना संक्रमित बिरामीको चाप हुने भएकाले कोरोनाका लागि हरेक ५ दिनमा एउटा लिक्विड ट्यांक वा दैनिक ८०० अक्सिजन सिलिन्डरको आवश्यकता पर्ने अस्पतालले विज्ञप्तिमा उल्लेख गरेको छ ।

कोरोनाका बिरामीको उपचार गर्न यथाशीघ्र अक्सिजन उपलब्ध गराइदिन अस्पतालले सरकारसँग माग समेत गरेको छ । अस्पतालमा हाल १३३ जना कोरोना संक्रमितको उपचार भइरहेको अस्पतालले जनाएको छ ।