प्रधानमन्त्री केपी शर्मा ओली २०७५ जेठ २ को अवस्थामा फर्किन सहमत भएका छन् । 
नेकपा एमालेको विवाद मिलाउने प्रयास स्वरुप शुक्रबार भएको वार्तामा प्रधानमन्त्री ओली  २०७५ जेठ २ को अवस्थामा फर्किन सहमत भएका हुन् । एमालेको माधव कुमार नेपाल समूहले जेठ २ को अवस्थामा फर्किए विवाद समाधान गर्न सकिने बताउँदै आएको थियो भने ओलीले यसअघि जेठ २ को अवस्थामा फर्किन आनाकानी गर्दै आएका थिए । 

तर शुक्रबार सिंहदरबारमा करिब पौने ३ घण्टा चलेको ओली र वरिष्ठ नेता नेपाल पक्षका नेताहरुबीच बैठकमा २०७५ जेठ २ मा फर्केर फर्किन ओली राजी भएका हुन् । 
बैठकपछि नेता भीम रावलले पार्टीको एकता कायम राख्नका लागि गम्भीरतापूर्वक छलफल भएको बताए ।  उनले ०७५ जेठ २ गते अघिको कुरालाई आधार मानेर अघि बढ्ने गरी छलफल भएको भन्दै त्यसका लागि कार्यदल बनाउने निर्णय भएको जानकारी दिए । 

उनले भने, ‘हाम्रो पार्टीको एकतालाई कायम राख्नको लागि हामीले गम्भीरतापूर्वक छलफल गर्यौं । त्यसको लागि २०७५ साल जेठ २ गतेभन्दा अगाडिका कुरालाई आधार मानेर अरु छलफल अघि बढाउने कुरा भयो । त्यो प्रयोजनका लागि पार्टी अध्यक्ष तथा प्रधानमन्त्री केपी ओलीले र वरिष्ठ माधव कुमार नेपालले कार्यदलको सदस्यहरु तय गर्ने कुरा भएको छ । र, तुरुन्तै वार्ता र कुराकानीलाई अघि बढाउने कुरा भएको छ । 

यस्तै बैठकपछि नेता रघुजी पन्तले सौहार्दपूर्ण वातावरणमा छलफल भएको प्रतिक्रिया दिए । 

यसैगरी नेता गोकर्ण विष्टले पनि २०७५ जेठ २ गतेको अवस्थामा फर्किएर पार्टीको समस्या समाधान गर्नेबारे सहमतिमा पुगिएको बताए । 
‘जेठ २ मा फर्किएर पार्टीको समस्या समाधान गर्ने सहमति भएको छ, त्यसको लागि कार्यदल बनाएर मोडालिटी बनाउने सहमति भएको छ’ विष्टले लोकान्तरसँग भने । 

कार्यदलबारे भोलि बिहान दुई शीर्ष नेताहरुबीच बसेर सदस्यहरुको टुंगो लगाउने विष्टले जानकारी दिए । 

छलफलमा ओली तथापाल सहित दुवै पक्षका प्रभावशाली नेताहरु सहभागि थिए । अध्यक्ष ओली र नेता नेपालबीच हिजो क्याप्टेन रामेश्वर थापाको घरमा भएको छलफलमा एमालेलाई पार्टी एकता अगाडिको अवस्थामा फर्काउने भद्र सहमति भएको थियो । 

पार्टीको विवाद अन्त्यका लागि कार्यदल बनाएर छलफल गर्ने दुई नेताबीच सहमति पनि भएको थियो । बैठकको निर्णयअनुसार ओली र नेपालले कार्यदलका सदस्यको टुंगो लगाउनेछन् ।