विवेकशील साझा पार्टीका संयोजक रविन्द्र मिश्रले मुलुकमा संघीयता केका लागि भन्दै प्रश्न गरेका छन् । 

शनिवार सामाजिक सञ्जाल फेसबूकमा एक स्टाटस लेख्दै उनले मुलुकमा संघीयता र स्थानीय सरकार केका लागि भन्दै प्रश्न गरेका हुन् । 

उनले मुलुक कोरोना संक्रमणको महासंकटमा रहेको बेला हरेक नागरिकले औषधि, अक्सिजन, अस्पताल, बेड, खाना, नाना, पैसा सबै आफैँ जोहो गर्नुपरेको बताएका छन् । 

उनले भनेका छन्, 'शीर्ष भनिने नेताहरू सरकार जोगाउने र ढलाउने कोठे संवादमा व्यस्त छन्। बाहिर जनता मरिरहेका छन्। मानवता नै नभएकाहरूमा सहानुभूतिको भाव हुने त कुरै भएन। तर भोलि फेरि जनअनुमोदित हुने त हामी नै हौँ भन्नेमा उनीहरू ढुक्क छन्।'

उनले प्रधानमन्त्री केपी शर्मा ओलीले राष्ट्रपति विद्यादेवी भण्डारीबाट प्रधानमन्त्रीको पद तथा गोपनीयताको सपथ ग्रहण गर्दा प्रतिज्ञा गर्छु नभनेकोप्रति लक्षित गर्दै भनेका छन्, 'ताली बजाइदिनेहरूको कमी नभएपछि कुपथमा हिँडिरहेकाहरूलाई सपथका शब्द अटेर गर्दा के नै फरक पर्थ्यो र ?'