प्रधानमन्त्री केपी शर्मा ओलीले कोरोना भाइरस संक्रमण रोकथाम तथा न्यूनिकरणका लागि निजी क्षेत्रसँग छलफल गरेर अगाडि बढ्ने भएका छन् । 

अबको केही बेरमा प्रधानमन्त्री निवासमा निजी क्षेत्र तथा विज्ञहरूसँग प्रधानमन्त्री ओलीले छलफल गर्न लागेको प्रधानमन्त्रीका प्रेस सल्लाहकार सूर्य थापाले लोकान्तरलाई जानकारी दिए । 

कोरोना भाइरसको दोस्रो भेरियन्ट नेपालमा फैलिएसँगै प्रधानमन्त्री ओलीले पहिलो पटक निजी क्षेत्र र विज्ञसहितको टोलीसँग छलफल गर्न लागेका हुन् । 

सल्लाहकार थापाले भने,'फैलिरहेको कोरोना रोकथाम तथा नियन्त्रणका लागि आवश्यक कदम चाल्न विज्ञहरूसँग प्रधानमन्त्री ओलीले छलफल गर्न लाग्नुभएको हो ।'

यता, नेपाल उद्योग परिसंघका अध्यक्ष सतिश मोरले प्रधानमन्त्री ओलीले राख्नुभएको छलफलमा आफूलाई पनि बोलाइएको जानकारी दिए । 

निजी क्षेत्रहरूसँग प्रधानमन्त्री ओलीले जारी निषेधाज्ञा र महामारीका बीच अर्थतन्त्रलाई कसरी चलायमान बनाउने भन्ने विषयमा पनि छलफल गर्ने बताइएको छ ।

यस अघि प्रधानमन्त्री ओलीले गत असार र भदौमा पनि उनीहरूसँग छलफल गरेका थिए ।