काठमाडौंको टोखा नगरपालिकालाई अक्सिजन कन्सन्ट्रेटर मशिन सहयोग गरिएको छ ।

काठमाडौंको उत्तरी क्षेत्रमा रहेको टोखामा दैनिकरूपमा नयाँ भेरियन्टसहित दोस्रो चरणको कोरोना संक्रमण तीव्रगतिमा बढिरहेको समयमा एनआईसी एशिया बैंकले ३ थान अक्सिजन कन्सन्ट्रेटर मशिन सहयोग गरेको हो ।

सोमवार बैंकका प्रमुख कार्यकारी अधिकृत रोशनकुमार न्यौपानेले नगरपालिकाका प्रमुख प्रकाश अधिकारीलाई ती सामग्री हस्तान्तरण गरे । कार्यक्रममा न्यौपानेले बैंकको सामाजिक उत्तरदायित्व कार्यक्रमअन्तर्गत कोरोना महामारी नियन्त्रणका लागि टोखा नगरपालिकालाई सहयोग गरेको जानकारी दिए ।

नगरपालिकाका प्रमुख अधिकारीले नगरपालिकालाई प्राप्त भएको मशिन सोमवारै टोखा चण्डेश्वरी प्राथमिक स्वास्थ्य केन्द्रलाई हस्तान्तरण गरिएको नगरपालिकाका प्रवक्ता बच्चुराज बस्यालले जानकारी दिए ।

मशिन सहयोगसँगै टोखामा अक्सिजन उत्पादनका लागि थोरै भए पनि सहयोग पुग्ने भएको छ । कोभिड–१९ महामारीलाई ध्यानमा राखेर नगरपालिकाले स्वास्थ्य सामग्री संकलन र अक्सिजन प्लान्ट राख्ने कामलाई प्राथमिकता दिइरहेको छ ।

स्वास्थ्य केन्द्रका लागि केही दिन पहिले सेभ द चिल्डेन संस्थाले ६ लाख ५० हजार रुपैयाँ मूल्य बराबरको स्वास्थ्य सामग्री सहयोग गरेको थियो । सामग्री उपप्रमुख ज्ञानमाया डङ्गोलमार्फत अस्पताललाई सहयोग गरेको हो ।

टोखामा हाल ५ हजार ६९५ कोरोना संक्रमित देखिएका छन् । तीमध्ये ९०५ सक्रिय संक्रमित रहेको सो नगरपालिकाले जनाएको छ । टोखाले हालसम्म ६ हजार ७४५ पीसीआर परीक्षण र १ हजार १९७ एन्टिजेन परीक्षण गरिसकेको छ ।

टोखामा हालसम्म कोरोनाका कारण १२ जनाले ज्यान गुमाइसकेका छन् ।