अरब सागरमा भारतीय जलसेनाको जहाज र हेलिकप्टरहरू पी३०५ बार्ज (मालवाहक जहाज) मा रहेको ९३ जनाको अझै पनि खोलतलाश गरिरहेका छन् । 

ती मानिसहरू बार्ज डुब्नुअघि लाइफ ज्याकेट लगाएर समुद्रमा हाम्फालेका थिए । 

त्यो बार्ज मुम्बईबाट लगभग ६५ किलोमिटर पर रहेको स्थानमा डुबेको हो । 

त्यसमा कुल २७३ जना थिए जसमध्ये १८० लाई उद्धार गरिएको छ ।

त्यस बार्ज बाहेक अन्य तीनवटा जहाजहरू समुद्रमा हराएका थिए । 

ती चारैवटा जहाज बम्बे हाई क्षेत्रमा एक अफशोर प्ल्याटफर्म मर्मतमा खटिएका थिए । 
 

ताउते चक्रवात आउँदा पी३०५ बार्ज बम्बे हाईको हीरा तेलखानी नजिक एंकर झारेर रोकिएका थिए । चक्रवातका कारण बार्जको एंकर भाँचियो र त्यो समुद्रमा डुब्यो । 

सोमवार राति त्यो डुब्नुअघि त्यसमा भएका मानिस लाइफ ज्याकेट लगाएर समुद्रमा हाम्फाले । मंगलवार रातिसम्ममा १८० जनालाई उद्धार गरिएको छ । 

अन्य तीन जहाजमा रहेका सबैको उद्धार भइसकेको छ । 
 

विज्ञहरूका अनुसार, चक्रवातले दिशा परिवर्तन गरेपछि जहाजका मास्टर झुक्किए र जहाजहरू समुद्रमा हराउन पुगे । 

त्यसो त चक्रवात निकै विनाशकारी छ भनेर पर्याप्त चेतावनी दिइएको थियो । तर त्यसले दिशा परिवर्तन गरेर कता जान्छ भनी भन्न सकिने स्थिति थिएन ।