नेकपा माओवादी केन्द्रले प्रतिनिधि सभाको विघटन गर्ने सरकारको निर्णय विरुद्ध कानूनी र राजनीतिक लडाई लड्ने बताएको छ ।

प्रतिनिधि सभा विघटन २०७७ पौष ५ गतेको प्रतिगामी कदमको निरन्तरताको अर्को कडी भएको माओवादीको आरोप छ ।

माओवादी अध्यक्ष पुष्पकमल दाहाल 'प्रचण्ड'ले शनिवार एक वक्तव्य प्रकाशित गरी कोरोना महामारीका कारण देश आक्रान्त भएको समयमा प्रतिनिधि सभा विघटन गर्नु निरंकुश र स्वेच्छाचारिताको पराकाष्टा भएको बताएका हुन् । 

‘हाम्रो पार्टी राष्ट्रपति र प्रधानमन्त्रीको मिलेमतोमा भइरहेको यस प्रकारको असंवैधानिक, अलोकतान्त्रिक, निरंकुश, प्रतिगामी एवं राष्ट्रघाती कदमको विरुद्ध कानूनी र राजनैतिक सबै प्रकारको संघर्ष गर्न प्रतिवद्ध छ’ प्रचण्डले वक्तव्यमा भनेका छन् । 

संविधानको धारा ७६ को उपधारा ३ को सरकारले विश्वासको मत नलिइ नयाँ प्रक्रिया शुरु गरिनु षडयन्त्र भएको उनको आरोप छ ।