नेपाली कांग्रेसका सभापति शेरबहादुर देउवालाई नेपालको संविधानको धारा ७६(५) को प्रधानमन्त्री नियुक्त गर्न माग गर्दै विपक्षी दलका सांसदहरू सर्वोच्च अदालत पुगेका छन् । 

विघटित प्रतिनिधि सभाका १४० भन्दा बढी सांसदको हस्ताक्षरसहित नेताहरू सोमवार सर्वोच्च अदालत गएका हुन् ।

रिटमा प्रधानमन्त्री केपी शर्मा ओलीले गरेको प्रतिनिधिसभा विघटन गैरसंवैधानिक भएको दाबी गरिएको छ । 

नेपाली कांग्रेसका केन्द्रीय सदस्य रमेश लेखकले विश्वासको मत नलिएका प्रधानमन्त्रीले गरेको प्रतिनिधिसभा विघटनको सिफारिस असंवैधानिक भएको दाबीसहित रिट तयार भएको जानकारी दिए । 

रिट निवेदनको पक्षमा नेपाली कांग्रेस र माओवादी केन्द्रका सांसदसहित नेकपा एमालेको माधव नेपाल पक्षका २३ र उपेन्द्र यादव पक्षका १२ सांसदले समर्थन जनाएका छन् ।