एमाले नेता योगेश भट्टराई केपी ओली समूहतिर फर्किएको चर्चाका बीच फेरि माधव नेपाल समूहतिरै देखिएका छन् । माधव नेपाल समूहले बुधबार जारी गरेको विज्ञप्तिमा योगेशको नाम पनि रहेको छ । 

नेपाल पक्षमा १५ स्थायी समिति सदस्यले केपी ओलीको कार्यशैलीको विरोध गर्दै निकालेको विज्ञप्तिमा भट्टराईको पनि नाम समावेश भएको हो । यसअघि ओलीको विकल्पमा काँग्रेस सभापति शेरबहादुर देउवालाई प्रधानमन्त्री बनाउने प्रयोजनका लागि भट्टराईले हस्ताक्षर नगरेपछि उनी ओली समूहतिर लागेको टिकाटिप्पणी हुन थालेको थियो । उसो त देउवालाई प्रधानमन्त्री बनाउन हस्ताक्षर नगर्ने गोकर्ण विष्टको पनि विज्ञप्ति जारी गर्ने १५ जनाको सूचीमा नाम छ । 

बुधवार जारी सामूहिक वक्तव्यमा अध्यक्ष तथा प्रधानमन्त्री ओलीविरुद्ध एकतावद्ध संघर्ष अपरिहार्य रहेको उल्लेख गरिएको छ ।