बुटवलमा २ दिनदेखि परेको अविरल वर्षाका कारण कोरोना विशेष अस्पतालमा पानी चुहिँदा सघन उपचार कक्ष (आईसीयू) जलमग्न भएको छ ।

आईसीयूभित्र पानी चुहिएपछि कोरोना संक्रमित बिरामी र स्वास्थ्यकर्मी सास्ती व्यहोर्न बाध्य भएका छन् ।

बुटवलको धागो कारखानामा कोभिड अस्पताल सञ्चालन गरिएको छ । 

आइसीयू कक्षको ९ र ११ नम्बर शय्या नजिकै पानी चुहिँदा नर्सहरूले बाल्टीमा पानी हालेर बाहिर फालिरहेका छन् ।

अस्पतालका फोकल पर्सन डा. नन्दु पाठकले ठूलो वर्षा हुँदा आईसीयू कक्षमा पानी चुहिएको जानकारी दिए । उनले लोकान्तरसँग भने, ‘ठूलो वर्षाका कारण पानी चुहिएको छ । मर्मत गर्न बोलाउँदा पनि कामदार आउन मान्दैनन् कोरोनाको डरले ।’ 

गत वर्ष पनि वर्षा हुँदा आईसीयूमा पानी चुहिएको थियो । कोरोना विशेष अस्पतालका फोकल पर्सन डा. नन्दु पाठकले पुरानो भवन भएका कारण पानी चुहिएको बताए ।

‘भवन केही ठूलो भएका कारण शय्या सारेर भए पनि अहिले काम चलाइएको छ । पानी रोकिनासाथ व्यवस्थापन पक्षसँग कुरा गरेर मर्मतको पहल थाल्छौं,’ उनले भने । धागो कारखानामा आईसीयू, भेन्टिलेटर र एचडीयू शय्या सहितको कोभिड अस्पताल छ ।