महान्यायाधिवक्ता रमेश बडालले प्रतिनिधि सभा विघटन सम्बन्धमा संवैधानिक इजलास गठनमा विपक्षीले प्रश्न उठाउन नमिल्ने बताएका छन् ।

यसरी प्रश्न उठाउने हो भने त सर्वोच्चमा रहेका न्यायाधीशमध्ये अधिकांशले सरकारको विपक्षमा आदेश गरेकाले प्रधानमन्त्रीलाई विपक्षी बनाएको मुद्दा कसैले पनि हेर्न नमिल्ने बताएका हुन् । 

आइतवार संवैधानिक इजलासमा न्यायाधीश बमकुमार श्रेष्ठ बस्न हुने कि नहुने भन्ने विषयमा भएको बहसको जवाफका क्रममा महान्यायाधिवक्ता बडालले विपक्षीले अनावश्यक माग राखेको बताए । 

‘विपक्षीले उठाएको प्रश्नमा जाने हो भने हामी पनि निवेदन दिन्छौं २० जना श्रीमान नै यो मुद्दाका लागि ठीक हुनुहुन्न,’ बडालले भने । 

रिट निवेदकमध्येकै केहीले प्रधानमन्त्री र प्रधानन्यायाधीशबीच भेट भयो भनेर लेखेको स्मरण गर्दै बडालले त्यसले अदालतलाई दबाब दिने काम गरेको जिकिर गरे ।

‘स्वच्छ बहस भएको छैन । उहाँहरूले मिडिया ट्रायल गर्नुभएको छ । मलाई मिडिया ट्रायल गरेको भन्ने ? उहाँहरूलाई मैले कानूनबमोजिम सम्झाएको हुँ,’ बडालले भने । 

त्यसअघि बहसका क्रममा रमन श्रेष्ठले महान्यायाधिवक्ताले मिडियामा अन्तर्वार्ता दिएको आरोप लगाएका थिए । 

‘उहाँहरू दायाँबायाँ हल्लिन थाल्नुभएकाले मैले उहाँहरूलाई सम्झाएको हो । कानून व्यवसायीको आचारसंहिता सम्झाएको हुँ । म अध्यक्ष भएकाले यसको दायित्व हो,’ बडालले भने । 

अहिले चिया ब्रेक भएको छ ।