नेप्से ३ हजार विन्दुमा पुगेर अन्तिममा दोहोरो अंकले घट्यो

३ हजार विन्दुमा पुगेर नयाँ कीर्तिमान कायम गरेको धितोपत्र बजारमा शेयर कारोबार मापक नेप्से परिसूचक अन्तिम समयमा भने दोहोरो अंकले घटेको छ ।

नेपाल स्टक एक्सचेन्जका अनुसार बुधवारको शुरूआती कारोबारमा नेप्सेले ३ हजार विन्दु छोएको थियो । यो हालसम्मकै उच्च थियो ।


Advertisement

पुनः बजार सम्हालिएर १३.५६ विन्दुले नेप्से घटी २ हजार ९४६.५८ मा ओर्लेको छ । ठूला कम्पनीको शेयर कारोबार मापन गर्ने सेन्सेटिभ परिसूचक २.८३ विन्दुले घटेर ५२५.२८ मा झरेको छ ।

कूल २२१ कम्पनीको ३ करोड १३ लाख ५४ हजार २२ कित्ता शेयर १६ अर्ब ९९ करोड ७० लाख ९२ हजार ७०३ मूल्यमा खरिद बिक्री भए ।

बुधवारको कारोबारपछि बजार पूँजीकरणमा सामान्य गिरावट आएको छ । नेप्सेका अनुसार बुधवारको बजार पूँजीकरण ४० खर्ब ९० अर्ब ७४ करोड ३५ लाख १० हजार रुपैयाँ बराबर रहेको छ ।

कारोबार भएका कूल १३ उपसमूहमध्ये बुधवार ६ उपसमूहको शेयर उकालो लागेको छ भने ७ उपसमूहको शेयर ओरालो लागेको छ । व्यापार ७८.९३, वित्त ४७.३८, निर्जीवन बीमा ३९, उत्पादन २३७.४६, जीवन बीमा २९.१२ र सामूहिक लगानी कोष ०.०३ विन्दुले उकालो लागेको छ ।

कारोबारका आधारमा बुधवार अरुण भ्याली हाइड्रोपावर शीर्ष स्थानमा रहेको छ । सो कम्पनीको ८७ करोड ९४ लाख ९० हजार १०७ बराबरको कारोबार भयो । पुनरबीमा कम्पनी ६१ करोड ८० लाख ३८ हजार ३९३, नेपाल इन्स्योरेन्स कम्पनी ५१ करोड ६ लाख ७१ हजार १५२, लुम्बिनी विकास बैंक ४८ करोड २८ लाख ९८ हजार २१९ र युनाइटेड मोदी ४७ करोड १४ लाख बराबरको कारोबार भई शीर्ष स्थानमा रहे ।

नेपाल इन्स्योरेन्स र युनाइटेड मोदीका लगानीकर्ताले समान ९.९५ प्रतिशतले कमाउँदा रिडी हाइड्रोपावर ९.९२, अरुण भ्याली हाइड्रोपावर ९.८६ र सीईडीबी हाइड्रोपावरका शेयर धनीले ९.८६ प्रतिशतले आर्जन गरे ।

युनाइटेड इदी मर्दी हाइड्रोपावर ९.८८, महालक्ष्मी विकास बैंक ६.३७, साइन रेसुङ्गा डेभलपमेन्ट बैंक ६.१५, मितेरी डेभलपमेन्ट बैंक ५.९७ र गरिमा विकास बैंकका लगानीकर्ताले ५.६३ प्रतिशतले गुमाएका छन् । 

कमेन्ट गर्नुहोस्