जनता समाजवादी पार्टीका केन्द्रीय कार्यकारिणी समिति अध्यक्ष उपेन्द्र यादवले निर्वाचन आयोगले गरेको निर्णयविरुद्ध सर्वोच्च अदालतमा रिट हाल्ने बताएका छन् ।

आयोगले सेटिङका आधारमा पार्टीको विधानविपरीत गलत निर्णय दिएको आरोप लगाउँदै उनले निर्णयविरुद्ध सर्वोच्च अदालतमा रिट हाल्ने बताएका हुन् ।

 ‘सेटिङका आधारमा निर्वाचन आयोगले निर्णय गरेको छ,’ यादवले लोकान्तरसँग भने, ‘निर्वाचन आयोगले गरेको निर्णय गलत छ, असंवैधानिक छ । आयोगको निर्णयविरुद्ध सर्वोच्च अदालतमा रिट हाल्छौं।’

जो सँग विचार छ, मुद्दा छ, संगठन छ, नेता तथा कार्यकर्ता छन्, त्यसैसँग जसपा रहने उनको कथन छ। पार्टीको केन्द्रीय कार्यकारिणी समितिमा समेत बहुमत भएका कारण जसपा आफ्नो पार्टी रहेको उपेन्द्रले बताए ।

‘उहाँहरूलाई नयाँ पार्टी दर्ता गर्नुछ भने गर्नुहुन्छ होला, हामी जसपामा नै बस्छौँ,’ यादवले भने, ‘अब अन्य कसलाई कहाँ जानुछ, जाओस्, त्यससँग जसपाको कुनै सरोकार रहेन।’

यसअघि उपेन्द्र यादवले जसपा अध्यक्ष महन्थ ठाकुरसहित वरिष्ठ नेता राजेन्द्र महतो, सर्वेन्द्रनाथ शुक्ल र लक्ष्मणलाल कर्णलाई साधारण सदस्य समेत नरहने गरी पार्टीबाट निष्कासन गरेका थिए ।

त्यसैगरी ठाकुरले पनि उपेन्द्र यादवलाई साधारण सदस्य नरहने गरी पार्टीबाट निष्कासन गरेका थिए ।

तर, दुवै पक्षका कारवाहीलाई निर्वाचन आयोगले अवैध भनेर अस्वीकार गरेको छ ।

पार्टीमा दुई जना अध्यक्ष रहेको अवस्थामा एक अध्यक्षले अर्को अध्यक्षलाई कारवाही गरेको कुरा कानून सम्मत निर्णय हो भनी मान्न मिलेन भन्दै आयोगले जेठ ३० गते कारवाहीलाई अवैध ठहर गरेको छ।

केन्द्रीय समितिको बैठक अध्यक्षको निर्देशनबाट बोलाइनेछ भन्ने कुरा पार्टीको विधानमा उल्लेख रहेको तथा पार्टीमा दुई जना अध्यक्ष रहेको देखिएकोमा सो बैठक दुबै अध्यक्ष वा एक अध्यक्षबाट बोलाइने हो भन्ने सम्बन्धमा विधान मौन रहेको पाइएको आयोगले गरेको निर्णयमा उल्लेख छ।

‘कुनै पनि अध्यक्षलाई हटाउँदा माथिल्लो समितिको अनुमोदन लिनुपर्नेछ भन्ने व्यवस्था भएकोमा दुवै अध्यक्षलाई एक अर्काले कारवाही गर्दा माथिल्लो समितिबाट अनुमोदन गरेको नदेखिएकाले कारवाहीलाई विधानसम्मत भन्न मिल्दैन ,’ आयोगले गरेको निर्णयमा उल्लेख छ।