फेसबूकमा नेपाल प्रहरीको पोशाक लगाएको फोटो राखेर प्रहरी नायव उपरीक्षक (डीएसपी) को परिचय दिँदै आएका व्यक्तिलाई पक्राउ गरिएको छ ।

महानगरीय अपराध महाशाखाबाट खटिएको विशेष प्रहरी टोलीले काठमाडौंको तारकेश्वर नगरपालिका–६ बस्ने ४४ वर्षीय कृष्णप्रसाद ढुङ्गानालाई  पक्राउ गरेको हो ।

तारकेश्वर नगरपालिकामा उनले सञ्चालन गरेको भिक्टोरिया फार्मेसीबाट पक्राउ गरी थप अनुसन्धान भइरहेको प्रहरीले जनाएको छ ।

प्रहरीले नक्कली डीएसपी ढुङ्गानाबाट कोही व्यक्ति पीडित भएमा महानगरीय अपराध महाशाखामा सम्पर्क गर्न अनुरोध गरेको छ ।

ढुङ्गानाले मेडिकल फर्म सञ्चालन गर्दै आएपनि नेपाल प्रहरीका कर्मचारीलाई सशस्त्र प्रहरीको डीएसपी र सशस्त्र प्रहरीका कर्मचारीलाई नेपाल प्रहरीको डीएसपी  भएको बताउने गरेको प्रहरीले जनाएको छ ।

ढुङ्गानाबाट नेपाल प्रहरीका विभिन्न पदहरूको पोशाक लगाएका फोटा ३, डीएसपीको पोशाक १, नेपाल प्रहरीको जर्सी १ र मोबाइल सेट १ बरामद गरिएको प्रहरीले जनाएको छ ।