रुसका राष्ट्रपति भ्लादिमिर पुटिनले अमेरिकी च्यानल एनबीसीका केर सिम्मोन्ससँगको अन्तर्वार्तामा सिम्मोन्सलाई थर्काएका छन् । 

सोमवार प्रसारित अन्तर्वार्तामा सिम्मोन्सले पुटिनलाई असहमतिका स्वर दबाउने कोशिश गरेको भन्दै घेर्न खोजेका थिए । उनले अहिले कारागारमा रहेका अभियन्ता अलेक्सी नभाल्नीको प्रसंग झिकेका थिए । 

त्यसमा पुटिनले प्रतिप्रश्न गरे, ‘म विपक्षीहरूबाट असुरक्षित अनुभव गर्छु भनी कसले भन्छ ? कसले तपाईंलाई यस्ता कुरा सुनाउँछ ? यो हास्यास्पद छ,’ उनले भने । 
 

नभाल्नीको संस्थाका विरुद्ध हालैका दिनमा अदालतले गरेको फैसला र विदेशी लगानीमा रहेका दुईवटा सञ्चार संस्था मेदुजा र भीटाइम्सलाई विदेशी एजेन्ट भन्नु दमनको रूपरेखा नभएको पुटिनले बताए । अमेरिकामा पनि त्यस्तै उपाय अपनाइने गरेको उनको भनाइ छ । 

पुटिन र सिम्मोन्सबीचको संवाद पछि पछि तात्दै गयो । पुटिनले बोल्दाबोल्दै सिम्मोन्सले रोक्न खोजे र उनको भनाइलाई चुनौती दिए ।

त्यसपछि पुटिनले रिसाउँदै भने, ‘म उत्तर दिऊँ कि नदिऊँ ? तपाईंलाई मेरो उत्तर मन परेन, त्यसैले रोकिरहनुभएको छ । यो अनुपयुक्त छ ।’

रुसको कुरा सोध्दा अमेरिकाको कुरा झिकेर पुटिनले ‘अनि के त’ शैली अपनाएको भनी सिम्मोन्सले आरोप लगाएपछि पुटिन रिसाए । 

उनले भने, ‘धैर्य गरेर मैले के भन्न खोजेको त्यसलाई टुंग्याउन दिनुस् । तपाईंलाई सबै कुरा स्पष्ट हुनेछ । तर तपाईंलाई मेरो उत्तर मन परिरहेको छैन । तपाईं मेरो उत्तर तपाईंको दर्शकले हेरोस् भन्ने चाहनुहुन्न । यही त छ समस्या । तपाईं मलाई चुप लगाउन खोज्दै हुनुहुन्छ । यही हो अभिव्यक्ति स्वतन्त्रता ? अमेरिकी शैलीको अभिव्यक्ति स्वतन्त्रता हो यो ?’