किशोरावस्थामा उत्तर कोरियाबाट भागेर अमेरिका पुगेकी र कोलम्बिया विश्वविद्यालयमा अध्ययन गरिरहेकी एक महिलाले अमेरिकामा उत्तर कोरियाकै जस्तो निरंकुशता देखि थालेको बताएकी छन् । 
 

योन्मी पार्क नामक ती महिला उनकी आमाका साथ सन् २००७ मा उत्तर कोरियाबाट चीनतर्फ भागेकी थिइन् । त्यतिखेर उनको उमेर १३ वर्ष मात्र थियो । आमाछोरीलाई नै मानव तस्करहरूले दास बनाएर बेचेका थिए ।

पछि क्रिस्चियन मिसनरीहरूको सहायताले उनीहरू मंगोलियातर्फ भाग्न सफल भए । कसोकसो गरी उनीहरू दक्षिण कोरिया पुगे । त्यहाँ पार्कले कलेज पढिन् अनि सन् २०१६ मा कोलम्बिया विश्वविद्यालय पुगिन् । 

फक्स न्युजसँगको अन्तर्वार्तामा पार्कले भनिन्, ‘म स्वतन्त्र हुनका लागि गोबी मरुभूमि पार गरेर अमेरिका आइपुगें तर अमेरिका पनि स्वतन्त्र रहेनछ । मैले यति धेरै पैसा, समय र ऊर्जा कसरी सोच्ने भन्नमा खर्च गरें । तर उनीहरू आफ्नो सोच विद्यार्थीहरूमा लाद्न खोज्दा रहेछन् ।’

‘मैले थाहा पाउँदै गएँ, यो त पागलपन जस्तै रहेछ । अमेरिका फरक होला जस्तो मलाई लागेको थियो तर मैले उत्तर कोरियाको जस्तै समानता देखेपछि चिन्तित हुन थालें ।’

कोलम्बियाका प्राध्यापकहरूले जे कुरालाई पनि उपनिवेशवादको चश्माले हेर्ने गरेको अनि गोरा मानिसप्रति घृणा फैलाउने गरेको पार्कको भनाइ छ । उनीहरूको निरंकुश सोचलाई नअपनाउने व्यक्तिहरूलाई बहिष्कार गर्ने गरेको पार्क बताउँछिन् ।