फर्नान्डो सान्तोसलाई नौ महिनाअघि एउटा प्रश्न सोधिएको थियो– पोर्चुगलमा क्रिस्टियानो रोनाल्डो नहुने हो भने अझ राम्रो हुन्थ्यो ?

प्रश्न सुनेर​ सान्तोसले कुम खुम्च्याए अनि उत्तर दिनुअघि मुस्काए । 

‘आफ्नो सर्वोत्कृष्ट खेलाडी नहुँदा संसारको कुनै पनि टीमले राम्रो प्रदर्शन गर्न सक्दैन,’ पोर्चुगललाई सन् २०१६ मा युरो जिताएका सान्तोसले भने । 

पाँचपटक बालोन दोर जितेका रोनाल्डोले फूटबल खेलमा विगत १९ वर्षदेखि प्रभाव जमाउँदै आएका छन् । 

उनी पोर्चुगलका राष्ट्रिय नायक हुन् र सदैव रहनेछन् । सन् २००४ को युरोको फाइनलमा पोर्चुगल ग्रीससँग हार्दा रोनाल्डो सानै थिए अनि ग्वाँ ग्वाँ रोएका थिए । 

त्यसपछि उनी खतरनाक खेलाडीका रूपमा उदाए । उनले धेरै कीर्तिमानहरू तोडेका छन् अनि आफ्ना क्लब र आफ्नो देशलाई धेरैथरी उपाधि जिताएका छन् । 

उनी थप कीर्तिमान तोड्न खोज्दैछन् । पोर्चुगलका लागि उनले १०४ गोल गरिसकेका छन् । इरानका अली दाइले बनाएको १०९ गोलको कीर्तिमान उनले तोड्ने लगभग पक्का छ । 

‘सबै कीर्तिमान भंग हुनैका लागि बनाइएका हुन् र म त्यो कीर्तिमान भंग गर्नेछु,’ रोनाल्डोले सन् २०१९ मा भनेका थिए । 

युरोमा उनले अन्य व्यक्तिगत कीर्तिमान बनाउने सम्भावना छ । 

एक गोल मात्र गरे भने पनि उनी युरोपेली च्याम्पियनशिपको इतिहासमा सर्वाधिक गोल गर्ने व्यक्ति बन्नेछन् र त्यसक्रममा फ्रान्सका महान् खेलाडी मिसेल प्लाटिनीलाई पछि पार्नेछन् । 
 

पोर्चुगलले एउटा खेल जित्नेबित्तिकै उनले स्पेनका खेलाडीहरू सेस फाब्रेगास र आन्द्रेस इनिएस्ताको युरोमा सर्वाधिक जीतको कीर्तिमान भंग गर्नेछन् । 

अनि पोर्चुगलले यसपालि युरो जितेछ भने लगातार युरो जित्ने दोस्रो कप्तान बन्नेछन् । 
 

युभेन्टसमा यसपालिको सीजन गतिलो नरहेको भए पनि रोनाल्डोको उत्साह उच्चस्तरको छ ।