इजरायलमा नफ्टाली बेनेटको नेतृत्वमा नयाँ सरकार गठन भएलगत्तै त्यहाँको वायुसेनाले गाजा स्ट्रिपमा बुधवार बिहानै हवाई आक्रमण गरेको छ । 
 

गाजाबाट लडाकूहरूले दक्षिण इजरायलमा बम भएको बलून पठाएपछि जवाफी कारवाहीस्वरूप हवाई आक्रमण गरिएको बताइएको छ । 

गत मे २१ मा इजरायल र गाजामा युद्धविराम भएपछि पहिलोपटक हवाई आक्रमण गरिएको हो । उक्त संघर्षमा २६० प्यालेस्टाइनी र १३ इजरायलीहरूले ज्यान गुमाएका थिए । 

प्यालेस्टाइनी स्रोतहरूका अनुसार, इजरायलको वायुसेनाले गाजाको खान युनेसको एक स्थानलाई तारो बनाएको छ । 

आफ्नो लडाकू विमानले हमास आतंकवादी संगठनको सैन्य प्रांगणमा आक्रमण गरेको इजरायलको भनाइ छ । 
 

गाजाबाट बम बोकेका बलूनहरूका कारण दक्षिणी इजरायलमा २० ठाउँमा आगो लागेको त्यहाँका अग्निनियन्त्रकहरूले बताएका छन् । जेरुसेलमको पुरानो शहरमा एक हजारभन्दा बढी उग्रराष्ट्रवादी प्रदर्शनकारीहरूले मंगलवार प्रदर्शन गरेपछि हामासले बलून पठाएको बताइएको छ । 
 

नफ्टाली बेनेट उग्रदक्षिणपन्थी नेता हुन् र उनी प्यालेस्टाइनीहरूलाई कठोर सन्देश दिनुपर्छ भन्ने मान्यता राख्छन् । त्यसैले उनको सरकार बन्नेबित्तिकै हवाई आक्रमणलाई प्राथमिकता दिएको विश्लेषकहरू बताउँछन् ।