फिलिपिन्सका राष्ट्रपति रोड्रिगो डुटेर्टेले कोरोनाभाइरसविरुद्धको खोप लगाउन अस्वीकार गर्ने व्यक्तिलाई जेलमा कोचिदिने चेतावनी दिएका छन् । 

देशमा कोरोनाका १३ लाखभन्दा बढी केस रहेको अनि २३ हजारजनाले ज्यान गुमाएको स्थिति रहँदा डुटेर्टेको चेतावनी आएको हो । 

‘तपाईं छनोट गर्नुस्–खोप लिने कि जेल जाने ?’ डुटेर्टेले सोमवार टीभीमा सम्बोधन गर्दै भने । 

राजधानी मनिलामा विभिन्न खोप केन्द्रमा एकदमै कम मानिस आएको खबर सार्वजनिक भएपछि डुटेर्टेको चेतावनी आएको हो । 

त्यसो त फिलिपिन्सका स्वास्थ्य अधिकारीहरूले मानिसलाई कोभिड–१९ को खोप लगाउन आग्रह गरिएको तर यो ऐच्छिक भएको बताएका छन् । 

‘मलाई गलत नबुझ्नुहोला, देशमा संकटको स्थिति छ,’ डुटेर्टेले बताए । ‘सरकारको कुरा नसुन्ने जनता देखेर म आजित छु ।’
 

आइतवारसम्म फिलिपिन्सका अधिकारीहरूले २१ लाख मानिसलाई खोप लगाएका छन् । तर यसै वर्षमा सात करोड मानिसलाई खोप लगाउने सरकारको लक्ष्य रहेकोमा अहिलेको खोप अभियान निकै सुस्त हो । 

भाइरस नियन्त्रण गर्नका लागि कठोर उपाय नअपनाएको भन्दै डुटेर्टेको आलोचना गरिएको छ ।