सभामुख अग्निप्रसाद सापकोटाले यस वर्ष मनसुनको शुरूआतसँगै देशका विभिन्न जिल्लामा आएको प्राकृतिक विपदबाट भएको क्षति न्यूनीकरणका लागि सरोकार भएका पक्षसँग छलफल गरेका छन् ।

उनले बाढी, पहिरो र डुबानबाट भएको क्षति र प्रतिकार्यका विषयमा राष्ट्रिय विपद् जोखिम न्यूनिकरण तथा व्यवस्थापन प्राधिकरणको उच्च नेतृत्व र सम्बन्धित क्षेत्रका विशेषज्ञसँग अलग–अलग छलफल गरेका हुन् ।

सिंहदरबारस्थित सभामुख सापकोटाको कार्यकक्षमा मंगलवार भएको छलफलमा प्राधिकरणका प्रमुख कार्यकारी अनिल पोखरेल सहितको टोलीले सिन्धुपाल्चोक, मनाङ्, चितवनलगायत देशका विभिन्न स्थानमा बाढी पहिरो र डुबानले पुर्‍याएको मानवीय र भौतिक क्षति र प्राधिकरणबाट भइरहेका प्रतिकार्यबारे जानकारी गराए ।

सो अवसरमा सभामुखले विपद्ग्रस्त क्षेत्रमा अल्पकालीन, मध्यकालीन र दीर्घकालीन योजनाअनुसार कार्य अगाडि बढाउन, विपत्तिबाट समस्यामा परेकालाई यथासक्य छिटो सम्बोधन गर्न र सबैभन्दा धेरै समस्या भोग्नुपरेको सिन्धुपाल्चोकमा छुट्टै युनिट बनाएर काम अघि बढाउन आग्रह समेत गरे ।

उनले यसअघि गत आइतवार विपद् व्यवस्थापनसँग सम्बन्धित विज्ञसँग छलफल गरेका थिए । देशभर र मूलतः सिन्धुपाल्चोकमा हालैको मनसुनजन्य विपत्तिबाट भएको क्षति, प्रभाव, पुनःस्थापना एवं पूर्व तयारीका विषयमा केन्द्रीत सो छलफलका सहभागीले ७७ जिल्लामध्ये भूगोल र मौसमका हिसाबले सो जिल्ला  निकै जोखिममा रहेको जानकारी गराउँदै अलग्गै योजना बनाएर काम गर्नु उपयुक्त हुने बताएका थिए ।

विज्ञले पूर्व तयारीका लागि पूर्व सूचना प्रणालीको विकास, जोखिम अध्ययन गरी पहिरो, नदी नियन्त्रणका क्षेत्रमा तत्काल काम शुरू गर्नुपर्ने बताएका थिए । सिन्धुपाल्चोकमा विपद् व्यवस्थापनको नमूनायोग्य काम गरी देशका अन्य स्थानमा पनि सो विधि लागू गर्न सकिने उनीहरूको सुझाव थियो ।

छलफलमा विज्ञहरू डा. गंगालाल तुलाधर, डा. हरिकृष्ण श्रेष्ठ, डा. रञ्जनकुमार दाहाल, डा. कृष्ण देवकोटा र डा. रविनराज निरौला सहभागी थिए । सभामुख सापकोटाले मंगलवारै सिन्धुपाल्चोकका प्रमुख जिल्ला अधिकारी अरुण पोखरेलसँग जिल्लाको पछिल्लो अवस्थाबारे जानकारी लिएका उनका प्रेस विज्ञ श्रीधर न्यौपानेले जानकारी दिए ।