प्रतिनिधिसभा विघटनविरुद्ध सर्वाेच्च अदालतमा दायर मुद्दामाथि संवैधानिक इजलासमा आज बुधवारदेखि शुरू भएको विषय केन्द्रित बहसको पहिलो दिन वरिष्ठ अधिवक्ता शम्भु थापाले ९६ मिनेट बहस गरेका छन् ।

प्रधानन्यायाधीश चोलेन्द्र शमशेर जबराले १५ घण्टाको समय तोकेपछि अरु अधिवक्ताले थोरै समय लिएपनि थापाले लामो बहस गरेका हुन् ।

बुधवार वरिष्ठ अधिवक्ता थापासहित वरिष्ठ अधिवक्ताद्वय महादेव यादव र बद्रीबहादुर कार्की तथा अधिवक्ता खम्बबहादुर खाती र गोविन्द बन्दीले बहस गरेका छन् ।

प्रधानन्यायाधीश चोलेन्द्र शमशेर जबरा नेतृत्वको संवैधानिक इजलासमा मुद्दाको सुनुवाइ भइरहेको छ । सर्वोच्चका वरिष्ठतम् न्यायाधीश दीपक कार्की, मीरा खड्का, ईश्वर खतिवडा र आनन्दमोहन भट्टराईको इजलासले यसअघि अन्तरिम आदेश दिन अस्वीकार गरेको थियो ।

जेठ २५ गते सर्वोच्चले कारण देखाऊ आदेश जारी गर्दै राष्ट्रपति, प्रधानमन्त्री र सभामुखसँग लिखित जवाफ माग गरेको थियो । 

प्रतिनिधिसभा विघटन सम्बन्धमा राष्ट्रपति विद्या भण्डारी, प्रधानमन्त्री केपी शर्मा ओली र सभामुख अग्नि सापकोटाले सर्वोच्च अदालतलाई महान्यायाधीवक्ता कार्यालयमार्फत जवाफ पठाइसकेका छन् ।

जेठ ७ गते प्रतिनिधिसभा विघटन भएपछि विघटित प्रतिनिधि सभाका १४६ सांसदको हस्ताक्षरसहित देउवाले सर्वोच्चमा रिट दायर गरेका थिए ।