बेलायतको ब्रिस्टलमा बस्ने ७२ वर्षीय एक व्यक्ति १० महिनाको अवधिमा ४३ पटक कोरोना पोजिटिभ भएका छन् । 

उनको नाम डेभ स्मिथ हो । उनी लगातार १० महिना कोरोना पोजिटिभ रहे । 

स्मिथले बताए, ‘मेरो ऊर्जाशक्ति पूरै क्षीण भएको थियो । एक रात त मलाई पाँच घन्टासम्म खोकी लागिरह्यो । मैले परिवारका सबै सदस्यलाई बोलाएँ अनि उनीहरूसँग म अब बाँच्दिनँ होला भनें ।’

उनले थपे, ‘मैले पत्नी लीनलाई मलाई मुक्ति देऊ पनि भनें ।’
 

लीनले पनि स्मिथ अब यो पीडादायी भोगाइलाई सहिरहन सक्दैनन् भन्ने ठानेकी थिइन् । 

पछि स्मिथको उपचार एन्टीभाइरल औषधिहरूको मिश्रणमार्फत गरियो र उपचारमा दुई हप्ता लाग्यो । चिकित्सकबाट उनले आफू कोरोना नेगेटिभ रहेको खबर पाउँदा विश्वास गर्न पनि सकेनन् । 

कोरोना नेगेटिभ भएको उपलक्ष्यमा उनले श्याम्पेनको बोतल खोले अनि मस्तसँग पिए ।