भारतले अग्नि शृंखलाको नयाँ क्षेप्यास्त्र अग्नि प्राइमको सोमवार सफल परीक्षण गरेको सरकारी स्रोतहरूले बताएको भनी भारतीय समाचार संस्था एएनआईले खबर दिएको छ । 

‘उडिसाको तटबाट केही पर जलक्षेत्रमा स्थानीय समयअनुसार आज बिहान १०ः५५ मा भारतले अग्नि प्राइम नामक नयाँ क्षेप्यास्त्र परीक्षण गरेको छ । नयाँ क्षेप्यास्त्र आणविक क्षमतासहितको छ र यसको प्रक्षेपणमा कुनै बाधाव्यवधान आएन,’ स्रोतहरूले बताए । 

डिफेन्स रिसर्च यान्ड डिभेलोपमेन्ट अर्गनाइजेसनका अधिकारीहरूले अग्नि क्षेप्यास्त्रको वर्गमा अग्नि प्राइम विकसित संस्करण भएको जनाएका छन् । 

‘यस क्षेप्यास्त्रको दायरा एक हजारदेखि दुई हजार किलोमिटर छ । पूर्वी तटमा रहेका विभिन्न टेलीमेट्री तथा राडार स्टेसनहरूले क्षेप्यास्त्रलाई ट्य्राक र निगरानी गरेका थिए । क्षेप्यास्त्र पूर्वनिर्धारित दिशामै अघि बढेको थियो र पूर्णतः सही रूपमा परीक्षण सम्पन्न भयो,’ अधिकारीहरूले थपे ।