भरतपुर अस्पतालमा कोभिडका बिरामी घटेसँगै सुत्केरी सेवा लिनेको संख्या बढेको छ । कोभिडका बिरामी बढी हुँदा जोखिम बढ्न सक्ने भन्दै बाहिर महँगो खर्चमा सुत्केरी गराउने गरिएको थियो ।

भरतपुर अस्पतालमा निःशुल्क प्रसूति सेवा दिइन्छ । शल्यक्रिया गर्नुपरेमा त्यही सेवाका लागि निजीमा चर्को शुल्क असुल्ने गरिन्छ । 

अस्पतालका स्त्री तथा प्रसूति रोग विभागका प्रमुख डा. सुनिलमणि पोख्रेल कोभिडका बिरामी घटेसँगै प्रसूतिका बिरामी बढेको बताउँछन् । 

कोभिडका बिरामी धेरै हुँदा दैनिक १२ देखि १५ जना अस्पतालमा सुत्केरी हुने गरेकोमा यो संख्या बढेर २० देखि २५ पुगेको उनको भनाइ छ ।

विगतका वर्षहरूमा अस्पतालमा दैनिक ३५ देखि ५० जनासम्मले सो सेवा लिएको स्मरण गर्दै उनले क्रमशः बढ्दै जाने बताए । 

प्रसूतिमध्ये ३६ प्रतिशत हाराहारीको शल्यक्रिया गरिने गरेको पोख्रेलको भनाइ छ । विगतमा यो प्रतिशत ३० हाराहारी थियो । 

कोभिडका बिरामी बढ्दै गर्दा पनि भरतपुर अस्पताल सुत्केरीका लागि सुरक्षित रहेको उनको तर्क छ । अस्पतालको स्त्रीरोग विभागमा १२ विशेषज्ञ चिकित्सकसहित स्नातकोत्तर गर्दै गरेका चिकित्सक र ७० नर्स छन् ।

अस्पतालका रहेका क्याबिनमा कोभिडका बिरामी रहेकाले सुत्केरी भएकालाई समस्या भएको छ । हाल १४ पुराना क्याबिनबाहेक अन्यत्र सबैमा कोभिडका बिरामी छन् । 

अस्पताल विकास समितिका अध्यक्ष डा. भोजराज अधिकारीले यो हप्ता हेरेर अर्को हप्ताबाट कोभिडका बिरामी राखिएको क्याबिन खाली गरेर सुत्केरी लगायतका बिरामीलाई दिइने जानकारी दिए । 

अस्पतालका सूचना अधिकारी लीलाधर पौडेलले असार १ गते १२ जना सुत्केरी भएकोमा १५ गते २४ पुगेको जानकारी दिए ।

अस्पतालमा १९० कोभिडका बिरामी राख्न मिल्छ । कोभिडका बिरामी बढ्दा जेठको पहिलो साता अधिकांश शय्या भरिएको पौडेलले जानकारी दिए। आज यो संख्या ७० मा झरेको छ । 

अस्पतालमा कोरोना सङ्क्रमित महिलाको समेत प्रसूति गरिन्छ । निजी अस्पतालले प्रसूति गराउनु पर्ने महिला सङ्क्रमित भएमा पनि भरतपुर अस्पताल पठाउने गर्दछन् । कोरोना संक्रमण देखिए यता अस्पतालमा ३२ संक्रमितले सुत्केरी सेवा लिइसकेका छन् । तीमध्ये १० जनाको शल्यक्रिया गरिएको हो । पौडेलले संक्रमित प्रसूतिका बिरामीलाई राख्ने र शल्यक्रिया गर्ने ठाउँ छुट्टै भएकाले आमाहरूले सुरक्षित महसुस गर्ने गरेको जानकारी दिए । 

उनका अनुसार यहाँ चितवनसहित १९ जिल्लाका महिला प्रसूतिका लागि आउँछन् ।