युरोपेली मुलुक स्लोभाकियामा उड्ने कार ३५ मिनेटमा एउटा शहरबाट अर्को शहरसम्म जाने परीक्षण सफल भएको छ । 
 

क्लाइन भिजन नामक कम्पनीले बनाएको एयरकार नित्रा शहरबाट राजधानी ब्राटिस्लाभासम्म गत सोमवार उडेको थियो । 

यो एयरकार प्रोटोटाइप १ मा १६० हर्सपावर बीएमडब्ल्यू इन्जिन छ र यसमा एउटा फिक्स्ड प्रोपेलर छ । यसले विमानलाई तीन मिनेटभन्दा कम समयमा सडकमा गुड्ने कार बनाउँछ । 

यस कारले ४० घन्टाभन्दा बढीको परीक्षण उडान गरिसकेको क्लाइन भिजनले जनाएको छ । यो ८२ सय फीटमाथि समेत उडेको छ र १९० किलोमिटर प्रतिघन्टाको गतिसम्म पनि पुगेको छ । 

सोमवार ब्राटिस्लाभामा अवतरण गरेपछि विमान कारमा परिणत भएको थियो र त्यसलाई क्लाइन भिजनका सीईओ स्टेफान क्लाइन र सहसंस्थापक एन्टोन जाजाकले गुडाएका थिए । 

‘एयरकार एटा अवधारणा मात्र रहेन,’ जाजाकले प्रेस विज्ञप्ति निकालेर बताए । ‘यसले विज्ञानकथालाई वास्तविकतामा परिणत गरेको छ ।’

कम्पनीले एयरकार प्रोटोटाइप २ मा काम गरिरहेको छ । त्यसमा ३०० हर्सपावर इन्जिन रहनेछ । 

यो ३०० किलोमिटर प्रतिघन्टाको गतिमा गुड्ने र यसको दायरा एक हजार किलोमिटर हुने अपेक्षा छ ।