२६ जेठ २०८३, मंगलबार
बैतडीमा आज बिहान भएको जीप दुर्घटनामा मृत्यु हुनेको संख्या तीन पुगेको छ ।
मृत्यु हुनेमा सिगास गाउँपालिका–३ का ४५ वर्षीय जयसिंह धामी, ४५ वर्षीय मानसिंह साउँद र ६४ वर्षीय रामसिंह धामीको मृत्यु भएको बैतडी प्रहरी प्रमुख डीएसपी रमेशबहादुर पालले जानकारी दिए ।
सिगास गाउँपालिका–३ बाट डडेल्धुरातर्फ जाँदै गरेको से १ ज ७३९ नम्बरको जीप लगनबजारनजिक दुर्घटना भएको हो । गाडीमा १६ जना सवार थिए ।
दुर्घटनामा १० जना घाइते भएका छन् । चारजनाको अवस्था गम्भीर रहेको डीएसपी पालले जानकारी दिए । ‘पाँचजना गम्भीर घाइतेमध्ये एकजनाको थप मृत्यु भएको हो,’ उनले भने, ‘घाइतेहरूलाई डडेल्धुरा अस्पताल पठाइएको छ ।’
दुर्घटनाको कारण भने खुलेको छैन ।
