बीपी स्वास्थ्य विज्ञान प्रतिष्ठानमा २१ दिनदेखि आन्दोलन, राजनीति घुस्दा पेचिलो बन्दै समस्या

उत्तम पोखरेल
उत्तम पोखरेल

पोखरेल लोकान्तर डट्कमका प्रदेश १ प्रतिनिधि हुन् ।

महामारीका बेला बिरामीहरूको उपचारमा रातदिन नभनी लाग्नुपर्ने अस्पतालजस्तो संवेदनशील संस्था समेत आफैं ‘थला परेको’ महिना दिन बित्न लाग्दा समेत सम्बन्धित निकाय मौन रहेको छ ।


Advertisement

सुनसरीको धरानमा रहेको बीपी कोइराला स्वास्थ्य विज्ञान प्रतिष्ठानको बेथितिविरुद्ध आन्दोलन चल्दै आएको २१ दिन बितिसक्दा समेत सरकार र सरोकारवाला निकाय मौन छ ।


Advertisement

चिकित्सक, नर्स, कर्मचारी र विद्यार्थीले शिक्षा र स्वास्थ्य जस्तो अति संवेदनशील क्षेत्रमा राजनीतिकरण भएको, भ्रष्टाचार बढेको, तलबभत्ता वृद्धि नभएको लगायतका माग राख्दै आन्दोलन गरिरहे पनि सरकारले भने त्यसको बेवास्ता गरिरहेको छ ।

आन्दोलनरत चिकित्सक तथा कर्मचारीले शिक्षा तथा स्वास्थ्यमा हुने चरम राजनीतिकरण बन्द गर्नुपर्ने, प्रतिष्ठानमा भएको भ्रष्टाचारको छानबिन गरी दोषीउपर कारवाही गर्नुपर्ने, उपकुलपति डा. ज्ञानेन्द्र गिरी, शिक्षाध्यक्ष डा. गुरु खनाल, रजिष्ट्रार डा. मोहनचन्द्र रेग्मी र निर्देशक गौरीशंकर साहले राजीनामा दिनुपर्ने माग अगाडि सारेका छन् ।


Advertisement

आन्दोलन चर्किँदै जाँदा उपकुलपति ज्ञानेन्द्र गिरीले वार्ताको माध्यमबाट समस्या समाधान गर्ने प्रस्ताव अगाडि सारेका थिए । आन्दोलनरत पक्षसँग वार्ताका लागि आएका उपकुलपति डा. ज्ञानेन्द्र गिरी मापासे गरेर आएपछि आन्दोलन चर्केको हो ।

कुलपति समेत रहेका प्रधानमन्त्री तथा स्वास्थ्य मन्त्रालयलाई जानकारी गराएपनि अहिलेसम्म समाधान गर्न कुनै प्रयास नभएको बीपी कोइराला शुद्धीकरण अभियान  संयुक्त संघर्ष समितिका सदस्य गणेश फुलाराले बताए ।

बीपी प्रतिष्ठान राजनीतिक हस्तक्षेपको शिकार बनेको भन्दै प्रतिष्ठान बचाउन २२ दिनदेखि डा. सूर्यप्रसाद रिमालको संयोजकत्वमा बीपी कोइराला शुद्धीकरण अभियान संयुक्त संघर्ष समिति नै गठन गरेर आन्दोलन भइरहेको छ ।

आन्दोलरत पक्षले आन्दोलनका स्वरूप परिवर्तन गरेर आन्दोलन गरिरहेका छन् । धर्ना दिने, र्‍याली निकाल्ने जस्ता काम गरिरहेका उनीहरूले सरकारले बेवास्ता गरे सामूहिक राजीनामा दिने चेतावनी समेत दिएका छन् ।

प्रतिष्ठानका पदाधिकारीहरू प्रतिष्ठान सुधार गर्न भन्दा आर्थिक अनियमितता गर्न सक्रिय रहेका कारण प्रतिष्ठानको अवस्था दिनप्रतिदिन कमजोर बन्दै गएको आन्दोलनरत पक्षको आरोप छ ।

सरकारले कोभिडमा खटिने डाक्टर तथा स्वास्थ्यकर्मीहरूलाई प्रोत्साहन दिने भने पनि अहिलेसम्म कसैले नपाएको डाक्टर उमेश शाहले बताए ।

शाहका अनुसार प्रतिष्ठानमा काम गर्ने जो कोहीले पनि बढेको तलब समेत समयमा नपाउने गरेको गुनासो छ । कोभिडको समयमा राज्यले दिने भनेर घोषणा गरेको प्रोत्साहन समेत नपाएपछि कोभिड अस्पतालको इमर्जेन्सीमा खटिएका डाक्टरहरूले सामूहिक राजीनामा दिएका थिए ।

‘मन्त्रालयमा सोध्यो भने प्रतिष्ठानमा पठाइदिएको भन्छ, प्रतिष्ठानले भरे भोलि दिन्छौं भन्छ,’ डाक्टर शाहले भने प्रतिष्ठान पछिल्लो समय भ्रष्टाचारको अखडा बनिरहेको छ । 

प्रतिष्ठानमा औषधि, उपकरण खरिद, इन्टरनेट, विद्युत् आपूर्ति लगायतका शीर्षकमा प्रतिष्ठानका पदाधिकारीले व्यापक भ्रष्टाचार गरेको भन्दै पटक–पटक विरोध हुने गरे पनि छानबिन भने हुन सकेको छैन । 

प्रतिष्ठानका उपकुलपति गिरी र निर्देशक साहले कोभिड अस्पतालमा खरिद गरिएको आईसीयू र भेन्टिलेटर बेडमा समेत १ करोड ५० लाख भ्रष्टाचार गरेको अडियो सार्वजनिक हुँदा समेत समन्धित निकाय मौन भएको भन्दै दिन प्रतिदिन आन्दोलन चर्किरहेको छ ।

आन्दोलनलाई साम्य पार्न पूर्व स्वास्थ्यमन्त्री ढकाल काठमाडौंबाटै सक्रिय छन् भने प्रतिष्ठानमा उपकुलपति गिरीले त्यसका लागि पहल गरिरहेका छन् ।

गिरीले आन्दोलन मत्थर बनाउन नेतादेखि पुराना प्राध्यापकहरूसँग छलफल बढाएका छन् भने ढकालले सिनेट सदस्यहरूलाई फोन गरेर नै आन्दोलनलाई साम्य पार्न भन्ने गरेको एक सिनेट सदस्यले बताए ।

गिरीले सक्रियता देखाए पनि आन्दोलनरत पक्षले भने वार्ता गर्दा कुलपति तथा स्वास्थ्य मन्त्रालयसँग गर्ने माग राखिरहेका छन् ।

‘वार्ताका लागि बस्दा उहाँ आफैँ मापसे गरेर आउनुभयो,’ एक डाक्टरले भने, ‘अहिले उहाँसँग बसेर समाधान हुने छाँटकाँट छैन ।’

ढकाल सक्रिय भएपछि आन्दोलनलाई मलजल गर्न नोबेल मेडिकल कलेजका सञ्चालक डाक्टर सुनिल शर्मा सक्रिय भएर लागेको आरोप समेत लाग्न थालेको छ ।

गिरी र शर्माबीच लामो समयदेखि अन्तरद्वन्द्व छ । 

भानुभक्त ढकाल स्वास्थ्यमन्त्री भएका बेला गिरी उपकुलपति नियुक्ति भएका थिए ।

ढकाललाई चुनाव जिताउनका लागि रुँदै भाषण गरेका गिरीलाई ढकालले उपकुलपति बनाएर चुनावको गुन तिरेको चर्चा पनि हुने गर्छ ।

उत्तम पोखरेल
उत्तम पोखरेल

लेखकबाट थप...

कमेन्ट गर्नुहोस्