मनसुन शुरू भएसँगै आएको बाढीपहिरोले हालसम्म मुलुकभरका १ सय ३ राष्ट्रिय राजमार्गहरूमा क्षति पुर्‍याएको छ । 

यी सडकहरूमध्ये १३ सडकहरूमा अहिले पूर्ण रूपमा यातायात अवरुद्ध रहेको सडक विभागले जनाएको छ । 

विभागका अनुसार मनाङमा डुम्रे–बेशीसहर–चामे सडकखण्ड अन्तर्गत तिमाङ छहरा, अरनिको राजमार्ग अन्तर्गत सिन्धुलीको लिपिङ पुल, मनाङको तिमाङ खोला, धारापानी र बगरछाप सडक पूर्ण अवरुद्ध बनेको छ । 

यस्तै सिन्धुपाल्चोकको जुरे, कोदारी, लमजुङको रामबजार, अर्खले र च्याम्चेमा सडक अवरुद्ध छ । 

यस्तै तनहुँको भन्सार, नाराणघाट मुग्लिन सडकखण्डअन्तर्गत चितवनको २० किलोमा पनि सडक अवरुद्ध छ । 

विभागका अनुसार, रसुवाको त्रिशुली खोलामा पनि सडक अवरुद्ध रहेको छ । 

जेठ ३० गतेदेखि हालसम्म विभिन्न ५५ सडकमा एकतर्फी सञ्चालनमा आएको  विभागले जनाएको छ । 

यस्तै ३५ सडक दुवैतर्फ सुचारू भएका छन् ।