अपांगतालक्षित घरदैलो स्वास्थ्य सेवा

अपाङ्गता भएकाहरुलाई लक्षित गरेर बुटवल उपमहानगरपालिकाले उनीहरुको घरदैलोमा प्राथमिक स्वास्थ्य सेवा उपलव्ध गराउन शुरू गरेको छ । 

अस्पतालसम्म लैजान गाह्रो हुने र असहज हुने विभिन्न तहका अपाङ्गता भएका बुटवलका नागरिकका लागि घरमै पुगेर स्वास्थ्य अवस्थाको जानकारी लिने र प्राथमिक स्वास्थ्य सेवा तथा औषधि निशुल्क उपलब्ध गराउने काम शुरू भएको उपमहानगरका प्रमुख शिवराज सुवेदीले जानकारी दिए । 

उपप्रमुख गुमादेवी आचार्य नेतृत्वमा स्वास्थ्यकर्मी, मनोपरामर्शदाता र कर्मचारीहरुको टोलीले बिहीबारदेखि घरदैलो अभियान शुरू गरेको हो । उपमहानगरका १९ वटै वडामा रहेका अपांगता भएकाहरुको लगत संकलन गरी उनीहरुको अवस्थाको विश्लेषण गरेर प्राथमिकताका आधारमा यस्तो अभियान शुरू गरिएको उपप्रमुख आचार्यले बताइन् । 

बुटवलमा विभिन्न १० प्रकारका अपाङ्गता भएका करिब १ हजार ३६५ जना रहेको तथ्यांक संकलन भएको छ । अहिले शुरू भएको घरदैलो स्वास्थ्य सेवाको पहिलो कार्यक्रम क र ख वर्गमा रहेका ३ सय २३ जनालाई पुर्‍याइने छ । त्यसपछि ग र घ वर्गका लागि अवस्था अनुसारका सेवा उपलव्ध गराउने गरी तयारी भइरहेको उपमहानगरका महाशाखा प्रमुख तुलसा अर्यालले बताइन् । 

घरदैलो स्वास्थ्य सेवाका अतिरिक्त बुटवलले अपांगता भएकाहरुलाई उनीहरुको रूचिका आधारमा विभिन्न सीपमूलक तालिमको समेत व्यवस्था मिलाएको छ । 

अपांगता भएकाहरुलाई शिक्षा, परामर्शलगायतका काम गर्दै आएका सुस्त मनस्थिति बाल विद्या मन्दिरका लोकनाथ भुषालले बुटवलले अपांगता लक्षित घरदैलो स्वास्थ्य सेवा सञ्चालन गरेर मुलुकमै नमुना काम गरेको भन्दै सराहना गरे ।

अपांगता भएका बुटवल–१२ नयाँगाउँ भैरहवा टोलका दिदीबहिनी ३६ वर्षीया सीला र २७ वर्षीया सीमा मल्ल, बुटवल–१६ मधैयाका १५ वर्षीया कमला पोखरेल तथा बुटवल १६ का दाजुबहिनी ३५ वर्षीय हरि र २८ वर्षीया मिना गौतमको स्वास्थ्य अवस्थाको जाँच गरिएको छ ।