२६ जेठ २०८३, मंगलबार
बलिउडका प्रसिद्ध अभिनेता दिलिप कुमारको केही दिन अघि मात्रै निधन भएको छ । उनले हिन्दी सिनेमामा अमिट छाप छोडेका छन्, जसलाई कहिल्यै भुल्न सकिने छैन ।
दिलिप कुमारका साथमा बलिउडका धेरै हस्तीहरूले काम गरेका छन् । अहिले पनि धेरै कलाकार छन्, जो दिलिप कुमारसँग जोडिएका सम्झनाहरूलाई बताइरहेका छन् ।
बलिउड कलाकार अनुपम खेरले पनि दिलिप कुमारसँग सन् १९८६ मा रिलिज भएको चलचित्र ‘कर्मा’ मा काम गरेका थिए ।
यो चलचित्रमा अनुपम खलनायकको भूमिकामा छन् । सोही चलचित्र छायांकनका बेला भएका किस्सा अनुपमले बताएका छन् ।
चलचित्रमा एउटा दृश्य छ, जहाँ दिलिप कुमारले अनुपम खेरलाई रिसाएर थप्पड हान्छन् । अनुपमले भने, ‘कर्मा चलचित्रमा मेरो र दिलिप साहबको एउटा थप्पडवाला सिन छ, जसमा दिलिप साहबले मलाई थप्पड हान्नुपर्ने थियो ।’
उनले आफू थिएटरबाट आएकाले दृश्यलाई वास्तविकता देखाउन साँच्चै थप्पड हान्नका लागि दिलिप कुमारलाई आग्रह गरे ।
‘दिलिप साहब मुस्कुराएर भन्नु भयो– यो पठानको हात हो, यदि तिमीलाई साँच्चै थप्पड हाने भने तिमीले जिन्दगीभर भुल्न सक्ने छैनौं, त्यसैले एक्टिङ मात्रै गर म तिमीलाई थप्पड हान्दिनँ,’ अनुपमले भने।
दिलिप कुमारको गत बुधवार मुम्बईको हिन्दूजा अस्पतालमा निधन भएको थियो । उनको निधनले बलिउड शोकमा छ ।
