खोप कार्ड प्रमाणीकरणका लागि भीड बढेपछि स्वास्थ्य सेवा विभागले अनलाइनबाटै प्रमाणीकरणको तयारी थालेको छ । 

स्वास्थ्य मन्त्रालयको निर्देशनअनुसार अनलाइन प्रणालीबाट खोप कार्ड प्रमाणीकरणको व्यवस्था गर्न लागिएको स्वास्थ्य सेवा विभागअन्तर्गतको परिवार कल्याण महाशाखाका निर्देशक डा. तारानाथ पोख्रेलले जानकारी दिए । 

‘अनलाइन दर्ता, प्रमाणीकरण र अनलाइनबाटै कार्ड निकाल्न सकिने व्यवस्थाका लागि तयारी गरिरहेका छौं,’ उनले भने, ‘प्राविधिक रुपमा समय लाग्ने, स्रोतसाधन, त्यस खालका जनशक्ति तयार गर्नुपर्ने र तालिम लिनुपर्ने हुनाले केही समय भने लाग्छ ।’

अहिले विभागले चार अस्पतालबाट खोप कार्ड प्रमाणीकरण गरिरहेको छ । यसअघि शुक्रराज अस्पताल टेकुबाट मात्रै प्रमाणीकरण भइरहेको थियो । 

त्यहाँ भीड बढेपछि तत्कालको समस्या समाधानका लागि थप तीन अस्पताल पाटन अस्पताल, सशस्त्र प्रहरी अस्पताल र सिभिल अस्पताललाई पनि प्रमाणीकरण गर्ने केन्द्र तोकिएको डा. पोख्रेलले बताए । वैदेशिक रोजगार, अध्ययन भ्रमणमा जाने विद्यार्थी र अन्य नागरिकहरूले खोप लगाएको प्रमाणीकरण गराउनुपर्ने हुन्छ ।