नेपाली कांग्रेसका वरिष्ठ नेता रामचन्द्र पौडेलले आफू पक्षीय नेताहरूलाई छलफलका लागि बोलाएका छन् । 

उनीहरूको अनौपचारिक छलफल आज दिउँसो १२ बजे महाराजगञ्जस्थित कांग्रेस महामन्त्री शशांक कोइरालाको घरमा बस्ने तय भएको नेता पौडेलले सचिवालयले बताएको छ ।

छलफलमा नेता पौडेल, महामन्त्री कोइराला, केन्द्रीय सदस्यहरू शेखर कोइराला, मीनेन्द्र रिजाल, अर्जुननरसिंह केसी, डा. रामशरण महतलगायत सहभागी हुने बताइएको छ ।

पार्टीमा देखिएको क्रियाशील सदस्यता विवाद समाधानको उपाय र महाधिवेशनको सम्भावित नयाँ कार्यतालिकाको विषयमा छलफल हुने छ । 

साउन ९ गते बसेको कांग्रेसको पदाधिकारी बैठकले वडा तहको अधिवेशन स्थगित गर्ने र नयाँ कार्यतालिका ल्याउने निर्णय गरेको छ । त्यसैगरी, क्रियाशील सदस्यता विवादको विषयलाई लिएर अनशनमा बसेका कार्यकर्तासँग वार्ता गर्न कांग्रेसका सहमहामन्त्री डा. प्रकाशशरण महत र केन्द्रीय सदस्य डा. रामशरण महतलाई जिम्मेवारी दिइएको छ ।

अनशनमा बसेका कार्यकर्तालाई सम्बोधन गर्ने विषयमा समेत आजको बैठकले छलफल हुने वरिष्ठ नेता पौडेलको सचिवालयले बताएको छ ।