२६ जेठ २०८३, मंगलबार
अमेरिकाका परराष्ट्रमन्त्री एन्टोनी ब्लिन्केनले भारतको दिल्लीमा बुधवार दलाई लामाका एक प्रतिनिधिलाई भेटेको मन्त्रालयका प्रवक्ताले जानकारी दिएका छन् ।
‘परराष्ट्रमन्त्री ब्लिन्केनले नयाँ दिल्लीमा आज बिहान दलाई लामाका प्रतिनिधि न्गोदुप दोङचुङसँग छोटो भेटघाट गर्नुभएको छ,’ ती अधिकारीले बताए ।
चीनबाट ६ दशकअघि भागेर भारतको शरणमा आएका दलाई लामालाई चीनले पृथक्तावादी मान्ने गरेको छ । दलाई लामाले चाहिँ आफू पृथक्तावादी नभएको र तिब्बतको ठोस स्वायत्तता तथा तिब्बती बौद्ध संस्कृतिको जगेर्ना गर्ने उद्देश्य मात्र रहेको बताउँदै आएका छन् ।
ब्लिन्केनले दलाई लामाका प्रतिनिधिलाई भेट्नु अमेरिकाको तिब्बत नीति तथा समर्थन ऐनअन्तर्गतकै गतिविधि भएको र यसले तिब्बतको भूरणनीतिक महत्त्व झल्काएको भारतका रणनीतिक चिन्तक ब्रह्मा चलानीले ट्वीट गरेका छन् । तिब्ब्तमा पहुँच नदिने चिनियाँ अधिकारीहरूलाई अमेरिकाले प्रतिबन्ध लगाएको छ ।
