मुलुकमा जनचेतनामूलक कार्यक्रम र प्रहरीको सक्रियता बढे पनि बलात्कार (जबरजस्ती करणी) र ज्यानसम्बन्धी अपराध घट्न सकेको छैन ।
 
कोभिड–१९ संक्रमणका कारण मुलुक आक्रान्त भई बन्दाबन्दीमा रहँदासमेत जघन्य प्रकृतिका घटना बढोत्तरी हुनुले अवस्था चुनौतीपूर्ण देखाएको छ ।

नेपाल प्रहरीका अनुसार विभिन्न ११ जघन्य तथा गम्भीर प्रकृतिका घटनामध्ये अधिकांश घटनाका मुद्दा दर्ता गर्ने क्रम बढेको छ । 

नेपालमा दैनिक ११० गम्भीर प्रकारका घटना हुने गरेको पाइएको छ । तीमध्ये सबैभन्दा बढी १७ दशमलव ४४ प्रतिशत आत्महत्याका घटना रहेका छन् । गत वर्ष दैनिक १९ जनाले आत्महत्या गर्ने गरेका पाइएको छ । यस्तै दैनिक ७ महिला तथा बालिका जबरजस्ती करणीमा परेका छन् । यद्यपि समग्र घटना संख्या हेर्दा जघन्य र गम्भीर प्रकृतिका घटना दर्तामा केही कमी आएको देखिन्छ ।

केन्द्रीय प्रहरी प्रवक्ता प्रहरी वरिष्ठ उपरीक्षक वसन्तबहादुर कुँवरले समग्र जघन्य प्रकृतिका घटना केही प्रतिशतले घटेको तर कर्तव्य ज्यान, जबर्जस्ती करणी, आत्महत्या लगायतका घटना भने बढेको बताए ।

प्राप्त विवरणअनुसार आव २०७६/७७ मा कर्तव्य ज्यानका ५५५ घटना भएकामा आव २०७७/७८ मा यसमा वृद्धि ६९७ पुगेको छ । यो आव २०७६/७७ को तुलनामा गत आर्थिक वर्षमा २५ दशमलव ५८ प्रतिशतले वृद्धि हो । त्यसको अघिल्लो दुई आर्थिक वर्षभन्दा पनि यसपालि कर्तव्य ज्यानसम्बन्धीका घटनामा वृद्धि भएको नेपाल प्रहरीले जनाएको छ । 

गत आर्थिक वर्षमा जबर्जस्ती करणीका घटना पनि झण्डै २१ प्रतिशतले वृद्धि भएको छ । आव २०७६/७७ मा दुई हजार १४४ करणीका मुद्दा दर्ता भएकामा गत आवमा बढेर २ हजार ५३४ पुगेको छ । त्यसको अघिल्लो दुई आवमा क्रमशः १ हजार ४८० र २ हजार २३० करणीका मुद्दा दर्ता भएको प्रहरीको अभिलेख छ । 

प्रहरी प्रवक्ता कुँवरले जबरजस्ती करणीका घटना भने नजिकका र चिनेजानेका व्यक्तिबाट नै हुने गरेको बताए । ‘उनीहरूबाट ८२ दशमलव २० प्रतिशत महिला करणी भएका छन्,’ उनले भने, ‘अझ सबैभन्दा बढी ११ देखि १८ वर्षका बालिका करणीमा पर्ने गरेका देखियो ।’

उनका अनुसार कूल जबरजस्ती करणीका घटनामध्ये उक्त उमेर समूहका ५३ दशमलव २४ प्रतिशत बालिका बलात्कृत हुन्छन् । झण्डै १२ प्रतिशत १० वर्षमुनिका बालिकामाथि बलात्कार हुने गरेको तथ्यांक प्रहरीसँग छ । – नारायण ढुङ्गाना/रासस