सुन्दरहरैचामा पनि खोपमा अनियमितता– मेडिकलमा लगेर नेता र आफन्तलाई लगाइयो

उत्तम पोखरेल
उत्तम पोखरेल

पोखरेल लोकान्तर डट्कमका प्रदेश १ प्रतिनिधि हुन् ।

मध्यरातमा कोरोनाविरुद्धको खोप बोकेर कांग्रेस कार्यकर्ताको घर पुगेपछि विराटनगर महानगरपालिकाका मेयर भीम पराजुली विवादमा तानिएको घटना सेलाउन नपाउँदै मोरङकै सुन्दरहरैचा नगरपालिकामा खोप अनियमितताको अर्को घटना बाहिरिएको छ ।

सुन्दरहरैचाका एक स्वास्थ्य कर्मचारीको निजी मेडिकलमा लगेर जनप्रतिनिधिका आफन्त तथा नेताहरूलाई खोप लगाएको घटना बाहिरिएको हो । 


Advertisement

मिर्गौलिया स्वास्थ्यचौकीका प्रमुख माधव रेग्मीको निजी सीता मेडिकलमा लगेर कोरोनाको खोप लगाउने गरेको पाइएको हो । 

सुन्दरहरैचाका नगर प्रमुख शिव ढकालसँगको मिलेमतोमै रेग्मीको मेडिकलमार्फत खोपको दुरुपयोग हुने गरेको स्थानीय जनप्रतिनिधिकै आरोप छ ।


Advertisement

नाम नबताउने शर्तमा सम्पर्कमा आएका ती जनप्रतिनिधिले गएराति पनि नेता र जनप्रतिनिधिका आफन्तलाई खोप लगाइएको जानकारी दिए ।

स्रोतका अनुसार मेडिकलमा नेताहरू गोपाल थापा, केदार गुरागाईं लगायतलाई खोप लगाइएको थियो ।

वडा नम्बर १० का वडाध्यक्ष राजेश थापाले मेडिकलमा खोप लगाइएको बताए । 

यता नगरपालिका स्वास्थ्य शाखाका कर्मचारी मचिन्द्र बस्नेतले आफूलाई थाहा नै नदिई कर्मचारीले खोपमा अनियमितता गरेको हुन सक्ने बताएका छन् ।

मेडिकल सञ्चालक समेत रहेका माधव रेग्मीले भने आफ्नोमा खोप नलगाइएको जिकिर गरे । यद्यपि उनको मेडिकलमा खोपका बट्टाहरू यत्रयत्र छन् ।

‘म पनि स्वास्थ्यमा काम गर्ने कर्मचारी भएकाले खोप बोक्ने भ्याक्सिन क्यारिअर आउँदा र खोप लैजाँदा बट्टा निकालेर फालेका हुन्, अरू केही होइन,’ उनले भने ।

खोप जति वडाध्यक्षहरूले हडप्ने गरेको उनको आरोप छ ।

यता नगरपालिकाकी उपमेयर धना तामाङले  यस विषयमा आफूलाई जानकारी नभएको बताइन् ।

मेयर शिव ढकालसँग पटक–पटक सम्पर्क गर्न खोज्दा कुराकानी हुन सकेन ।

पछिल्लो समय स्थानी तहका जनप्रतिनिधिहरूले खोपमा अनियमितता गर्न थालेका छन् ।

विराटनगरका मेयर भीम पराजुलीले खोपमा  अनियमितता गरेपछि युवाहरूले महानगरको गेटमै नाराजुलुस गरेका थिए ।

उक्त घटनाले देशव्यापीरूपमा चर्चा पाएको थियो ।

उत्तम पोखरेल
उत्तम पोखरेल

लेखकबाट थप...

कमेन्ट गर्नुहोस्