स्वास्थ्य तथा जनसंख्या मन्त्रालयले बालबालिकाहरूका लागि भेन्टिलेटर सहितका आईसीयू बेड थप्ने कार्य अगाडि बढेको जानकारी दिएको छ ।

स्वास्थ्य तथा जनसंख्या मन्त्रालयका प्रवक्ता डा. कृष्णप्रसाद पौडेलले बालबालिकाहरूका लागि १८० भेन्टिलेटरसहित २५० बेड आईसीयू थप्ने जानकारी दिए ।

स्वास्थ्य मन्त्रालयले नेपालमा कोरोना संक्रमणको तेस्रो लहर शुरू हुनसक्ने भन्दै कोरोना उपचार भइरहेका अस्पताललाई बालबालिकाहरूका लागि छुट्टै २० प्रतिशत बेड तयारी अवस्थामा राख्न यसअघि नै निर्देशन दिइसकेको छ ।

डा. पौडेलले देशभर हाई डिपेन्डेन्सी युनिट (एचडीयू) बेड पनि विस्तार गर्न लागेको जानकारी दिए ।

उनले देशभर थप १ हजार ४०० एचडीयू बेड विस्तार गर्न लागिएको बताए । हाल देशभरका सरकारी अस्पतालहरूमा २ हजार ७५ र निजी क्षेत्रका अस्पतालमा ७७८ एचडीयू बेड सञ्चालनमा रहेका छन् ।

पौडेलले भेन्टिलेटरहरूको संख्या ९०४ पुर्‍याइएको र १८० थप्न लागिएको जानकारी दिए । कोरोना संक्रमितको उपचारमा अत्यावश्यक पर्ने मेडिकल अक्सिजनको आपूर्ति सुदृढ गर्नका लागि सरकारले ५ हजार ५०० अक्सिजन कन्सन्ट्रेटर ल्याइसकेको जानकारी दिए ।

यस्तै ३ हजार ५०० अक्सिजन कन्सन्ट्रेटर आउने क्रममा रहेको जानकारी गराए । डा. पौडेलले ६ हजार ३७७ अक्सिजन सिलिन्डर थप गरिएको बताए । १९ वटा अक्सिजन प्लान्ट, २७ वटा अक्सिजन ट्यांक थप गर्ने योजनाअन्तर्गत ३ वटाको कार्य सम्पन्न गरिएको बताए ।

उनले विश्वव्यापी महामारीको अवस्थामा नेपाली जनतालाई कोभिड–१९ विरुद्धको खोप समयमै उपलब्ध गराउन सरकार प्रतिबद्ध रहेको जानकारी दिए । मन्त्रालयले विज्ञप्ति जारी गर्दै हालसम्म भारत सरकारको अनुदानबाट प्राप्त १० लाख र नेपाली सेनालाई प्राप्त १ लाख, भारतको सेरम इन्स्टिच्युटबाट खरिद गरिएको १० लाख तथा कोभ्याक्सबाट प्राप्त ३ लाख ४८ हजार मात्रासहित कूल २४ लाख ४८ हजार कोभिसिल्ड खोप प्राप्त भएको जानकारी दिए ।

चीनबाट अनुदानमा प्राप्त १८ लाख मात्रा तथा नेपालले चीनको साइनोफार्म कम्पनीसँग गरिएको खोप खरिदको सम्झौता अनुसार ४० लाख मात्रा गरी कूल ५८ लाख मात्रा भेरोसेल खोप आपूर्ति भइसकेको बताए । अमेरिकाबाट अनुदानमा प्राप्त जोन्सन एन्ड जोन्सनबाट १५ लाख ३४ हजार ८५० मात्रासहित हालसम्म जम्मा ९७ लाख ८२ हजार ८५० मात्रा खोप प्राप्त भइसकेको बताए ।

डा. पौडेलले चीनको साइनोफार्म कम्पनीसँग ६० लाख मात्रा खोप खरिदको सम्झौता अगाडि बढिसकेको बताए । जापान सरकारले अनुदानमा उपलब्ध गराउने १६ लाख मात्रा र भारतबाट खरिदको बाँकी १० लाख मात्रा प्राप्त हुँदा असोज मसान्तभित्र कूल १ करोड ८३ लाख ८२ हजार ८५० मात्रा खोप प्राप्त हुने उनले जानकारी दिए ।

उनले कोभ्याक्सबाट १ करोड ५० लाख डोज र १२ वर्षमाथिका बालबालिकालाई ६० लाख डोज फाइजर खोपका लागि पनि सकारात्मक रूपमा कार्य अगाडि बढिरहेको बताए । गाभी कोभ्याक्सबाट निःशुल्क २० प्रतिशत जनसंख्याका लागि प्राप्त हुने १ करोड १३ लाख डोज पनि प्राप्त हँुदै जाँदा चैत मसान्तसम्म सम्पूर्ण नेपालीहरूको पहँुचमा खोप पुग्ने बताए ।

उनले खोप आयात गर्न इच्छुक निजी क्षेत्रलाई विश्व स्वास्थ्य संगठन र नेपालको नियामक निकाय औषधि व्यवस्था विभागबाट आकस्मिक प्रयोग अनुमति प्राप्त कुनै पनि खोपहरू उत्पादन मूल्य र आयात खर्चमा अधिकतम १० प्रतिशतसम्म मुनाफा लिएर सरकारले तोकेको प्राथमिकताको समूहलाई लगाउन मिल्ने गरी स्वीकृति दिइसकेको जानकारी दिए । गोरखापत्र दैनिकमा खबर छ ।