बरिष्ठ नेता माधवकुमार नेपाल पक्षले बिहीबारका लागि राखेको केन्द्रीय कमिटीको बैठकमा सहभागि नहुन नेकपा एमालेको संस्थापन पक्षले नेता कार्यकर्तालाई निर्देशन दिएको छ । एमाले पार्टी केन्द्रीय कार्यालयका सचिव शेरबहादुर तामाङले बुधवार साझ एक विज्ञप्ति प्रकाशित गरी माधव नेपाल पक्षको बैठकलाई अनधिकृत भनेका हुन् । 

विकसित पछिल्लो घटनाक्रमको समीक्षा र भावी रणनीति बनाउन नेपाल पक्षले भोलिका लागि केन्द्रीय कमिटीको बैठक बोलाएको छ । बुधवार बस्ने भनिएको बैठक भोलिका लागि सारिएको थियो । 

भोलिको बैठकबाट माधव नेपाल पक्षले अध्यक्ष केपी शर्मा ओलीसँग मिल्ने कि नयाँ पार्टी गठन गर्ने भन्नेबारे निर्णय लिने ठानिएको छ । माधव नेपाल पक्षको केन्द्रीय कमिटीको बैठकको पूर्वसन्ध्यामा एमाले केन्द्रीय कार्यालयले बुधवार राति विज्ञप्ति प्रकाशित गरेको हो । 

‘पटक पटक एमालेको नामबाट अनधिकृत गतिविधि गर्ने र सो गतिविधिमा सरिक हुने विषय संविधान, प्रचलित कानून र पार्टी विधान विपरित हुने भएकोले सो गतिविधिमा नलाग्न कार्यकर्ताहरूमा अपिल गर्दछ’ तामाङले जारी गरेको विज्ञप्तिमा भनिएको छ । 

यसअघि गत चैत्र ४ र ५ गतेका लागि आयोजना गरिएको कार्यकर्ता भेलाको पूर्वसन्ध्यामा पनि रोक्न आग्रह गर्दै वक्तव्य जारी गरिएको थियो । माधव नेपाल पक्ष सरकारमा सहभागि हुन सक्ने भन्दै सत्ता गठबन्धनले मन्त्रिपरिषद् विस्तारमा ढिलाइ गरेको छ । 

पार्टी विबाद समाधानका लागि दुवै पक्षका नेता सम्मिलित कार्यदलले १० बुँदे सहमति गरेपनि माधव नेपालले त्यसको स्वामित्व लिन इन्कार गर्दै आएका छन् । 

हेर्नुहोस विज्ञप्ति