१ नम्बर प्रदेशका सभामुख प्रदीपकुमार भण्डारीले कानूनी प्रावधान विपरीत २ वटा गाडी प्रयोग गर्ने गरेका छन् । 

प्रदेश सभाका पदाधिकारी तथा सदस्यको सुविधा सम्बन्धमा व्यवस्था गर्न बनेको ऐनमा सभामुखले एउटा गाडी सुविधा पाउने व्यवस्था गरिएको छ । ऐनको अनुसूची १ मा पदाधिकारी तथा सदस्यले पाउने सुविधामा उल्लेख गरिएको छ ।

सभामुख भण्डारीले इसुजी मक्स जीप र क्रेटा कार गरी २ वटा सवारीसाधन प्रयोग गर्ने गरेका छन् । को१ज ६६६ नम्बरको इसुजी मक्स जीप र प्र १–१–०२–००१झ–००१० नम्बरको कार सभामुख भण्डारीले प्रयोग गर्ने गरेका प्रदेशसभा सचिवालयले जनाएको छ ।

इसुजी मक्स जीप १ करोड ३६ लाख ९० हजार रुपैयाँ र कार ३८ लाख ४६ हजार १ रुपैयाँमा खरिद गरिएको सचिवालयले जनाएको छ ।

प्रदेशका पदाधिकारी बिलासी भएका र काम केही नदेखिएको भन्दै संघीयताको आलोचना भइरहेका बेला सभामुख भण्डारीले कानून विपरीत सवारीसाधन सुविधा लिएका छन् । सभामुखलाई प्रतिमहिना १२५ लिटर डिजेल दिने व्यवस्था ऐनमा छ तर सभामुख भण्डारीले हरेक महिना दुवै गाडीका लागि १२५/१२५ लिटर गरी कूल २५० लिटर डिजेल लिने गरेका छन् ।

सभामुख भण्डारीले एउटा मात्रै गाडी प्रयोग गर्ने गरेको दाबी गरे । को१ज ६६६ इसुजी मक्स जीप मात्रै प्रयोग गर्ने गरेको भण्डारीले दाबी गरे । ‘मैले प्रयोग गर्ने गाडी बिग्रेको समयमा मात्रै अर्को प्रयोग गर्ने गरेको छु,’ उनले भने । तर सचिवालयका अनुसार दुवै गाडीका लागि सभामुख भण्डारीले २५० लिटर डिजेल हरेक महिना लिने गरेका छन् ।

१ नम्बर प्रदेश सभाका नेपाली कांग्रेसका प्रमुख सचेतक केदार कार्कीले घरभाडाको सट्टा घर मर्मत शीर्षकमा ६० हजार रुपैयाँ लिएका संसद सचिवालयले जनाएको छ ।

आर्थिक वर्ष २०७४/०७५ मा वार्षिक ८६ हजार ८९६.५५ रुपैयाँ प्रतिव्यक्ति घरभाडा बुझेका सांसदले पछिल्ला वर्षमा बढेको घरभाडा बुझेका छन् । आव २०७५/०७६ मा सुविधा बढाएर सांसदले वार्षिक १ लाख ८० हजार रुपैयाँ घरभाडा बुझेका थिए । आव ०७६/७७ मा घरभाडा सुविधा फेरि बढेर वार्षिक २ लाख २८ हजार रुपैयाँ पुग्यो । आज ०७७/७८ मा समेत सांसदले बढेकै घरभाडा वार्षिक २ लाख २८ रुपैयाँ बुझेका छन् । आव ०७४/७५ मा वार्षिक ८६ हजार रुपैयाँ रहेको सांसदको घरभाडा तेस्रो आव २०७६/७७ मा तेब्बर बढेर २ लाख २८ हजार पुगेको देखिन्छ । प्रदेशका १ जना सांसदले घरभाडाबापत ४ वर्षमा ७ लाख २२ हजार ८९६ रुपैयाँ बुझेका छन् । 

कोरोना भाइरस संक्रमणको महामारीका बेला अधिकांश सांसद आफ्नै घरमा बसेर घरभाडा लिएका छन् । महामारीका बेला सर्वसाधारणलाई अक्सिजनको अभाव, खाद्यान्नको अभाव, आर्थिक संकट भइरहँदा सांसदहरू सेवासुविधा बढाएर राज्यस्रोतको दोहनमा लागेका छन् ।

‘धेरै माननीयज्यूहरू आफ्नै घरमा बस्नुहुन्छ तर घरभाडा बुझ्नुहुन्छ,’ संसद सचिवालयका एक कर्मचारीले नाम नखुलाउने शर्तमा भने, ‘कानूनले पाएको भनेर छाड्दैनन्, घरभाडा त कहाँ छाड्नु, १० रुपैयाँको एउटा मास्क पनि माननीयज्यूहरूले छाड्नुहुन्न ।’

मोरङको विराटचोक घर भएका १ नम्बर प्रदेशका वन, उद्योग तथा पर्यटन राज्यमन्त्री राजकुमार ओझालाई पार्टीका कार्यकर्ताले निवासको सुविधा नलिन सुझाव दिएका थिए । मन्त्री ओझाले १ महिनासम्म आफ्नै घरमा बसेर मन्त्रालय आउने–जाने गरे । आफ्नै घरमा आफैं बसेको घरभाडा मन्त्री ओझाले लिएका छन । मन्त्री ओझाले मासिक २४ हजार रुपैयाँ घरभाडाबापत लिएका मन्त्रालयले जनाएको छ । मन्त्रालय स्रोतका अनुसार मन्त्री ओझाले १ महिनासम्म भान्से नियुक्त गरेर घरायसी काममा प्रयोग गरेका थिए ।

झापा, मोरङ र सुनसरीका सांसदहरू आफ्नै घरबाट संसद भवन आउने गरेका छन् भने पहाडी जिल्लाका केही सांसदको घर इटहरी, विराटनगर, धरान, बिर्तामोड, दमक लगायत बजारमा छन् । 

आफ्नै घरमा बसेका केही सांसदले भने घरभाडा बापतको सुविधा लिएका छैनन् । घरभाडा नलिने सांसदमा चुमनारायण तवदार, जीवन घिमिरे, विद्यानन्द चौधरी, सावित्राकुमारी रेग्मी छन् । यी सांसदले प्रदेशसभा शुरू भएदेखिको घरभाडा लिएका छैनन् ।