कतारको दोहास्थित नेपाली दूतावासले अफगानिस्तानमा फसेका नेपालीलाई उद्धार गरेर दोहा ल्याइएको विषयबारे कुनै जानकारी नभएको जनाएको छ । 

कतारका लागि नेपाली राजदूता डा. नारदनाथ भारद्वाजले दोहामा नेपालीलाई अमेरिकी सेनाको विमानले उद्धार गरेर दोहा ल्याएको भन्ने हल्ला भए पनि हालसम्म आधिकारिक रुपमा कुनै पनि सूचना प्राप्त हुन नसकेको बताएका छन् । 

'हामीलाई अहिलेसम्म कन्फर्म सूचना, आधिकारिक सूचना प्राप्त भएको छैन,' भारद्वाजले लोकान्तरसँग भने, 'अफगानिस्तानबाट दोहा नजिक भएको तथा अमेरिकन एयर बेससमेत यहाँ भएको हुनाले केही नेपालीलाई उद्धार गरेर ल्याइएको हुन पनि सक्छ, त्यसको सम्भावना पनि छ तर त्यसबारे हामीलाई कुनै पनि किसिमको सूचना प्राप्त हुन सकेको छैन ।' त्यसबारे आधिकारिक सूचना नेपालस्थित परराष्ट्र मन्त्रालयलाई नै हुने उनले बताए।

अफगानिस्तानमा फसेका नेपालीलाई उद्धार गरेर दोहा लगिएको भन्ने किसिमका समाचारहरू आएका छन् ।