नेकपा एमालेले अफगानिस्तानमा तालिबानले राजधानी कब्जा गरेको विषयमा नेपाल सरकारको धारणा माग गरेको छ ।

एमालेले अफगानिस्तानमा रहेका नेपालीको तत्काल उद्धार गर्न सरकारसँग माग गरेको छ । 

सोमवार बसेको प्रतिनिधि सभा बैठकको शुरूमै सभामुखसँग समय लिएर एमालेका सांसद गोकुल बाँस्कोटाले अफगान घटना क्रान्ति या प्रतिक्रान्ति हो भन्ने विषयमा सरकारको आधिकारिक धारणा मागेका हुन् ।

‘हिरो भनिएका प्रधानमन्त्री जिरो हुनुभएको छ । अफगान घटना क्रान्ति हो या प्रतिक्रान्ति हो, यसबारे जान्न चाहन्छौं,’ बास्कोटाले भने, ‘२०७३ सालमा अफगानिस्तानमा विस्फोटमा परेकाको एमाले सरकारले उद्धार गरेको थियो ।  अहिले सरकार कहाँ छ ? जनता जान्न चाहन्छन् ।’ 

बाँस्कोटाले अफगानिस्तानमा रहेका नेपालीको उद्धारको विषयमा ‘कम्फरटेबल’ सरकार मौन बसेको आरोप लगाए । 

‘सरकारले यस विषयमा संसद्लाई जानकारी गराउनुपर्छ । त्यहाँ रहेका नेपाली सुरक्षित छन् भन्ने जानकारी गराउनुपर्छ र त्यहाँ रहेका नेपालीलाई सकुशल फिर्ताको प्रतिबद्धता आजै चाहन्छौं,’ बाँस्कोटाले भने । 

अफगानिस्तान घटनामा वैदेशिक हस्तक्षेप पराजित भएको बाँस्कोटाले टिप्पणी गरे । ‘अफगानिस्तानमा दुईजना राष्ट्रपति कार्जाइ र गानी ग्रीन कार्ड होल्डर हुनुहुन्थ्यो । सार्कको हैसियतले नेपालको दृष्टिकोण छ छैन ? यस घटनाबाट नेपालले के बुझ्ने हो ?’ बाँस्कोटाले भने । 

बाँस्कोटाले अफगानिस्तानमा रहेका नेपालीको अवस्थाबारे सरकारले आजै जानकारी गराउनुपर्ने बताए ।