अफगानिस्तानमा अलपत्र परेका तथा फसेका नेपाली नागरिकको उद्धार गर्नका लागि देशभरबाट चासो व्यक्त गरिएको छ ।

प्रतिनिधि सभाको बैठकमा समेत धेरै जसो सांसदहरूले सोमवार माग गरेका छन् । सोमवार नै सरकारले समेत मन्त्रिपरिषद्को बैठकबाट अफगानिस्तानमा फसेका नेपाली नागरिकलाई उद्धार गर्ने निर्णय गरेको छ ।

यस्तो अवस्थामा सबै भन्दा बढी सक्रिय हुनुपर्ने परराष्ट्र मन्त्रालय भने गम्भीर देखिएको छैन ।

अफगानिस्तानमा फसेका नेपाली नागरिक कुन अवस्थामा छन्, कसरी उद्धार भइरहेको छ भन्ने कुराको जानकारी हालसम्म परराष्ट्र मन्त्रालयले सार्वजनिक गरेको छैन । त्यस सन्दर्भमा लोकान्तरले बिहान ११ बजेदेखि साढे ३ बजे सम्म लगातार प्रवक्ता सेवा लम्साललाई फोन गर्दा पनि फोन उठाएकी छैनन् ।

म्यासेज गर्दा पनि 'क्यान यू कल लेटर, आइ एम इन मिटिङ' जस्ता म्यासेजमा जवाफ मात्र दिने गरेकी लम्सालले फोन उठाएकी छैनन् ।

प्रवक्ताको काम नै सञ्चारकर्मीको फोन उठाएर जानकारी दिनुपर्ने रहेको अवकाश प्राप्त एक सचिवले बताए । 'यस्तो संवेदनशील अवस्थामा परराष्ट्र मन्त्रालयले बुलेटिन जारी गरेर होस् वा प्रेस वक्तव्य जारी गरेर नै किन नहोस् आफ्नो नागरिकको अवस्थाबारे जानकारी गराउनु पर्थ्यो,' ती सचिवले भने,'झन् प्रवक्ताको काम नै फोन रिसिभ गरेर मन्त्रालयको धारणा तथा काम कारवाहीको विषयमा सार्वजनिक गर्नु पर्ने हो ।'

दिनभरमा लोकान्तरले मन्त्रालयका प्रवक्ता लम्सालका साथै सूचना अधिकारी रीता धिताललाई समेत फोन गरे पनि उनले समेत फोन उठाएकी छैनन् ।