नेपाल आयुर्वेद चिकित्सक संघका पूर्व अध्यक्ष एवं वरिष्ठ आयुर्वेद विशेषज्ञ चिकित्सक ऋषिराम कोइरालाको निधन भएको छ । 

लामो समयदेखि मुटुको समस्या झेल्दै आएका वरिष्ठ आयुर्वेद विशेषज्ञ चिकित्सक ६२ वर्षीय डा. कोइरालाको हृदयाघातका कारण मंगलवार दिँउसो १ बजे ह्याम्स अस्पतालमा उपचारका क्रममा निधन भएको स्व. कोइरालाका आफन्त मधुविलास पौडेलले जानकारी दिए ।

उनलाई २ हप्ता पहिले हृदयाघात भएर उपचारका लागि ह्याम्स अस्पताल लगिएको थियो । 

विक्रम संवत् २०१५ भदौ २५ गते साबिक पुरानकोट गाविस–३ हाल बेंसीशहर नगरपालिका–४ मा जन्मेका कोइराला काठमाडौंको धापासीस्थित आयुर्वेद हेल्थ होम प्रालिका सञ्चालकसमेत थिए ।
    
नेपालको आयुर्वेदिक क्षेत्रलाई अन्तर्राष्ट्रियस्तरसम्म फैलाउन महत्त्वपूर्ण भूमिका खेलेका कोइरालाको काठमाडौं महानगरपालिका–२६ लैनचौरमा प्रभु ऋषि आयुर्वेद समेत सञ्चालनमा ल्याएका थिए ।

काठमाडौंको रानीवनमा आयुर्वेद अस्पताल सञ्चालनमा ल्याउने तयारीमा रहेका स्व. कोइरालाले अमेरिका र युरोप पुगेर नेपालमा आयुर्वेद चिकित्सा क्षेत्रका सम्भावनाबारे प्रवचन दिनुका साथै बिरामीको स्वास्थ्य परीक्षण गर्दै आएका थिए । उनी क्लासिकल हर्बल प्रोडक्ट प्रालिका अध्यक्ष थिए ।

लमजुङको दुराडाँडास्थित सर्वोदय उच्च माध्यमिक विद्यालयमा ६ कक्षासम्मको अध्ययन गरेका स्व. कोइरालाले पछि नवलपरासी बसाइँसराइ गरेका थिए ।

हाल काठमाडौंको धापासीमा बस्दै आएका स्व. कोइरालाका पत्नी, २ छोरा र १ नाति छन् । उनका दुवै छोरा चिकित्सक छन् । उनको मंगलवारै पशुपति आर्यघाटमा अन्त्येष्टि गरिने परिवारजनले बताएको छ ।