अफगानिस्तानको राजधानी काबुलबाट भाग्न खोजिरहेका पश्चिमी मुलुकका नागरिकले आफूहरूलाई भीडले किचेको र जिउ छामछुम गरेको बताएका छन् । 

विमानस्थल बाहिर तालिबान चेकपोइन्टमा रोकिएका अफगानहरू भागाभाग गर्दा यस्तो स्थिति आएको हो । 

तालिबान लडाकूहरूले काबुल विमानस्थललाई घेराबन्दी गरेका छन् र त्यहाँ पुग्ने सबै नाकामा नियन्त्रण गरेका छन् । उनीहरूले को देश छोडेर जाने अनि को नजाने भन्ने विषयमा निर्णय लिनेछन् । 

बेलायतको रोयल मरिनका पूर्व कमान्डो पल फार्दिङले गर्भवती पत्नीलाई भीडले विमानस्थल बाहिर धकेलेको, कुल्चेको र जिउ छामछुम गरेको बताए । त्यहाँ उपस्थित बेलायती र अमेरिकी सैनिकहरूले आफूहरूलाई भित्र पस्न नदिएको पनि उनको भनाइ छ । 

एक महिला विद्यार्थीले काबुल विमानस्थलमा आत्तिएको भीडमा आफू किचिने हो कि भनी डराएको बताइन् । काबुलमा अध्ययनरत आईशा अहमदले भनिन्, ‘विमानस्थलमा हजारौं मानिस थिए । एक समयमा हामी सबैलाई तालिबान प्रहरीले विमानस्थलबाट बाहिर धकेल्यो । महिला र बालबालिकालाई भीडले कुल्चियो । भीडमा मलाई सास फेर्न पनि गाह्रो परेको थियो । म मर्छु जस्तो लागेको थियो । मेरा गोडा सुन्निएका छन् र घावै घाउ छ । जर्मनी जाने एउटा विमानमा चढ्न पाइएला कि जस्तो लागेको थियो तर जर्मन नागरिकलाई मात्र लिएर त्यो उड्यो ।’

उनले थपिन्, ‘मिडियामा आएको खबर हेर्दा विमानस्थलभित्रको वातावरण शान्त भएको लाग्छ । तर बाहिर सडकमा भीडभाड छ । मानिसहरू आतुर छन् ।’

आइतवार तालिबान आइपुगेपछि काबुल भूताहा शहर जस्तो बनेको उनले बताइन् । अधिकांश पसलहरू बन्द भएको र सुरक्षा स्थिति झन् झन् बिग्रिँदै गएको उनको भनाइ छ । लुटपाट हुने सम्भावना रहेको उनी बताउँछिन् ।