साताको अन्तिम कारोबार दिन बिहीवार शेयर बजार परिसूचक नेप्से ५०.३७ अंकले घट्दा २९२६.६५ विन्दुमा झरेको छ ।

आज नेप्सेमा बजार परिसूचकसँगै सबै उपसूचकमा गिरावट भएको छ ।

विकास बैंक, वित्त कम्पनी र हाइड्रोपावर उपसूचकमा उच्च गिरावट हुँदा बजारलाई लिड गर्ने बैंकिङ उपसूचक पनि ०.८३ प्रतिशतले घटेको छ ।

वित्त कम्पनी उपसूचकमा सर्वाधिक ३.६८ प्रतिशतले गिरावट हुँदा हाइड्रोपावर उपसूचक ३.३८ प्रतिशत र विकास बैंक उपसूचक ३.२९ प्रतिशतले घटेको छ । यस्तै, जीवन बिमा उपसूचक पनि २.१३ प्रतिशतले घटेको छ ।

बजार परिसूचकसँगै हाइड्रोपावर उपसूचकमा उच्च गिरावट हुँदा पनि कारोबार रकममा भने हाइड्रोपावर कम्पनीमा नै आकर्षण देखिएको छ ।

आज नेप्सेमा १८४ कम्पनीको कम्पनीको शेयर कारोबारमा आएकोमा १५८ कम्पनीको शेयर मूल्य घट्दा २३ कम्पनीको भने बढेको छ । त्यस्तै, तीन कम्पनीको शेयर मूल्य स्थिर रह्यो । आज ९ अर्ब ५० करोड ५९ लाख ७० हजार रुपैयाँ बराबरको कारोबार भएको छ ।

आज नेप्सेमा अरुणभ्याली हाइड्रोपावरको सर्वाधिक ५७ करोड ४० लाख १२ हजारको कारोबार हुँदा अपी पावरको ३२ करोड ९९ लाख ९८ हजार, ङ्यादी पावरको २३ करोड ३१ लाख ४७ हजार, युनाइटेड मोदी हाइड्रोपावरको २२ करोड २० लाख ७५ हजार र  हिमालयन डिस्टिलरीको २० करोड १० लाख ७९ हजारको कारोबार भएको छ ।

आईपीओ जारी गरेर नेप्सेमा सूचीकृत भई आजदेखि कारोबार सुरु भएको सानिमा लाइफ इन्स्योरेन्स र केही समयअगाडि नेप्सेमा सूचीकृत भएको मनकामना स्मार्ट लघुवित्तको शेयर मूल्य बढेर सर्किट लेभलमा बन्द हुँदा चन्द्रागिरि हिल्सको शेयर मूल्य ५.२३ प्रतिशत, खानीखोला हाइड्रोपावरको ५ प्रतिशत र गत आर्थिक वर्षको मुनाफाबाट आजै मात्रै २० प्रतिशत बोनस शेयर प्रस्ताव गरेको डिप्रोक्स लघुवित्तको शेयर मूल्य ४.३२ प्रतिशतले बढेको छ ।

शेयर मूल्य घट्नेमा भने नारायणी डेभलपमेन्ट बैंक ६.८७ प्रतिशतसहित सर्वाधिक अगाडि रहँदा कर्पोरेट डेभलपमेन्ट बैंकको शेयर मूल्य ६.४८ प्रतिशतले घटेको छ । त्यस्तै, अरुण काबेली पवारको शेयर मूल्य ६.०९ प्रतिशतले घटेको छ ।