बिहेलाई मानिसको जीवनको महत्तवपूर्ण खुशीका रूपमा लिइन्छ । बिहेका क्रममा पटक–पटक बाधा आएपछि कसको मन नरोला ?

यस्तै घटना भएको छ इङ्ल्यान्डकी २९ वर्षीया लिडा इवान्ससँग । लिडाको तय भइसकेको विवाह दुईपल्ट कोरोना भाइरस संक्रमणको महामारीका कारण टर्‍यो । तेस्रोपटक बिहे हुने मिति तय भएपछि उनी खुशी थिइन् । उनीसँगै गाडीमा आमाबुवा पनि थिए ।

बिहेका लागि तयार भएर लिडा चर्चतिर गइरहेका बेला बाटोमै कार बिग्रियो । त्यसपछि उनले कार्यक्रमस्थलसम्म पुग्न बाधा उत्पन्न भयो । अनि उनी सडकमै धुरुधुरु रोइन् ।

अर्काेतिर दुलाहा पक्ष सेन्ट मेरी चर्चमा दुलहीको प्रतीक्षा गरिरहेका थिए । दुलही संकटमा परेको बेला ट्राफिक प्रहरी त्यहाँ पुग्यो ।

प्रहरीले दुलहीसहित आफन्तलाई आफ्नो गाडीमा राखेर चर्च पुर्‍यायो । प्रहरीले साइरनवाला गाडीको संख्या बढाएर दुलहीलाई कार्यक्रमस्थलमा पुर्‍यायो । दुलही लिडाले भनिन्, ‘म अविश्वसनीय रूपबाट खुशी छु । यो सानदार रह्यो ।’