महानगरीय ट्राफिक प्रहरी कार्यालय कोटेश्वरको गेटबाट छिर्ने बित्तिकै ट्राफिक प्रहरीका ५ वटा डमी थन्क्याएर राखेको देख्न सकिन्छ ।

दुईवटा डमी टोपीसहितका छन्, तीन वटाको टोपी छैन । एउटालाई ज्याकेट पनि लगाइएको छ । बर्दी भने सई र जवानको लगाइदिएको देख्न सकिन्छ ।

यी तिनै डमी हुन्, जो एक वर्षअघि काठमाडौंका चोकचोकमा थिए । २०७७ भदौ १९ देखि काठमाडौंका सडकमा ट्राफिक नियम पालना गराउन पहरा दिने डमी एक वर्ष बित्न नपाउँदै गोदाममा थन्किने अवस्थामा पुगेका हुन् ।

डमीहरूलाई धुलाम्मे अवस्थामा प्रहरी कार्यालयहरूमा थन्क्याएर राखिएको छ ।

तत्कालीन ट्राफिक प्रहरी महाशाखाका प्रमुख वरिष्ठ प्रहरी उपरीक्षक (एसएसपी) भीमप्रसाद ढकाल प्रमुख भएको समयमा नेपालमा नौलो प्रयासका रूपमा डमी ट्राफिक भित्र्याइएको थियो ।

त्यतिबेला सिंहदरबार, माइतीघर, जावलाखेल, सातदोबाटो, नयाँ बानेश्वर, बालुवाटार, एकेडेमी मोड, लैनचौर, भोटाहिटी, रणोद्वीप,  भद्रकाली,  थापाथली, कालिमाटी, कलंकी, जडिबुटी, कोटेश्वर, गौशाला, पुरानो बानेश्वर, कृष्ण पाउरोटी, पद्मोदय मोड, नागढुंगा र जगातीमा डमी राखिएका थिए ।

त्यसको सिको गर्दै उपत्यका बाहिरका जिल्लाहरूमा पनि डमी ट्राफिक राख्ने क्रम देखिएको थियो । उपत्यकाबाहिर रुपन्देही, कपिलवस्तु, नवलपरासी, झापा लगायतका जिल्लाका मुख्य चोकका डमी ट्राफिक देख्न पाइन्थ्यो ।

डमी ट्राफिकले ट्राफिक नियम उल्लंघन गर्नेलाई ५ हजार देखि १० हजारसम्म जरिवाना हुने सन्देश लेखेको प्लेकार्ड समेत बोकेका थिए ।

ट्राफिक प्रहरीको उपस्थिति नरहेको बेलामा पनि डमीले ट्राफिक नियम पालना गराउन मद्दत गर्ने प्रहरीको विश्वास थियोे ।

‘रातिको समयमा तीव्र गतिमा आएका सवारी साधनहरू ट्राफिक प्रहरी जस्तै ठानेर सीमित गतिमा हिँड्छन्, र दुर्घटना हुनबाट जोगिन्छ भन्ने हामीले विश्वास लिएका छौं,’ ढकालले भनेका थिए ।

एक वर्षमै थन्किए डमी

महानगरीय ट्राफिक प्रहरी महाशाखाका प्रवक्ता प्रहरी उपरीक्षक (एसपी) सञ्जीव शर्मा दासका अनुसार डमी ट्राफिकहरूलाई सडकबाट निकालेर नजिकको प्रहरी कार्यालयमा राखिएको छ ।

‘हामीले अहिले कोरोना संक्रमण कम भएका कारण र पानी पनि परेका कारणले कार्यालयमा राखेका हौं,’ एसपी  दासले लोकान्तरसँग भने, ‘अब अहिले पोहोर सालजस्तो कोरोना संक्रमित पनि त छैैनन् नि !’

कोरोनाको बेलामा ट्राफिक प्रहरीको काममा डमीका कारण केही सहयोग पुगेको थियो । महाशाखाको अनुरोधमा काठमाडौं महानगरपालिकाले डमी प्रहरी राख्नका लागि सहयोग गरेको थियो ।

डमीहरूलाई दैनिक हेरचाह गर्नुपर्ने, धुलोले कपडा बिग्रिएको, झरी परेको आदि कारणले थन्क्याएर राखिएको प्रवक्ता दासको भनाइ छ ।

चाडपर्व नजिकिएकाले फेरि डमीलाई सडकमा उतार्ने तयारी छ ।

‘अब चाडपर्व आउँदैछ, त्यो समयमा ट्राफिक प्रहरीको संख्यामा कमी आउँछ, त्यसलाई परिपूर्ति गर्न सडकमा ल्याउने तयारी गरिरहेका छौं,’ एसपी दासले भने, ‘उनीहरूको कपडाको पनि बन्दोबस्त गर्नुपर्ने देखिन्छ ।’

एउटा डमीलाई २० हजार खर्च !

काठमाडौं महानगरपालिकाको सहयोगमा ५० वटा डमी ट्राफिक उपत्यकाका ३ वटा जिल्लाका मुख्य चोकमा राखिएको थियो ।

काठमाडौं महानगरपालिकाका एक कर्मचारीका अनुसार त्यो समयमा डमी बनाउन प्रतिगोटा १५ हजार र त्यसको बर्दीका लागि ५ हजार गरेर लगभग २० हजार खर्च लागेको थियो । 

‘५० वटालाई १० लाख खर्च गरेर उपत्यकाका सडकमा राखिएको थियो,’ एक कर्मचारीले लोकान्तरसँग भने ।

त्यसलाई सफा गर्न र च्यातिएको बर्दी नयाँ ल्याउनका लागि बजेट समेत नभएको महानगरीय ट्राफिक प्रहरी कार्यालयका प्रवक्ता दासले बताए ।