नेकपा एमालेका नेता महेश बस्नेतले सभामुख अग्निप्रसाद सापकोटा प्रतिनिधिसभाका सभामुख नबनेर प्रचण्ड, माधव नेपाल, शेरबहादुरको मतियार बनेको आरोप लगाएका छन् ।

बुटवलमा राष्ट्रिय युवा संघले सोमवार आयोजना गरेको पत्रकार सम्मेलनमा नेता बस्नेतले सभामुख निष्पक्ष बन्न नसक्दा समस्या आएको बताए ।

बस्नेतले सबैको पक्षमा रहनुपर्ने सभामुख प्रचण्ड, माधव नेपाल र शेरबहादुरको मतियार बनेको आरोप लगाए ।

‘पार्टीको ह्वीप उल्लंघन गरेको कारण पार्टीले कारवाही गरेका नेताहरूलाई पदमुक्त नगरेर सभामुख आफ्नो पार्टी फोड्ने मतियार बने,’ बस्नेतले भने, ‘उनी निष्पक्ष बन्न सकेनन् ।’

नेता बस्नेतले देउवा सरकारले संसदलाई कुनै बिजनेश दिन नसक्ने दाबी गरे । उनले भने, ‘सरकारले कानून बनाउन सक्दैन र संसदलाई बिजनेश पनि दिन सक्दैन ।’

बस्नेतले प्रचण्ड र माधव नेपालको महत्त्वाकांक्षाले पार्टी एकता नटिकेको बताए । प्रचण्ड मर्ने बेलामा एक्लो बन्ने निश्चित भएको दाबी गरे ।

उनले दलीय व्यवस्था नै खतम पार्ने गरी अदालतको काइते फैसला गरेकाले अस्थिरता र द्वन्द्व जन्मिएको बताए । नेता बस्नेतले आगामी चुनावमा एमालेको बहुमत आउने दाबी गरे । कांग्रेस प्रतिपक्षमै आउने उनले ठोकुवा गरे ।

एमाले सांसद समेत रहेका बस्नेतले सरकारले ल्याएको बजेटसम्बन्धी प्रतिस्थापन विधेयक गैरकानूनी रहेको दाबी गरे ।

‘जनयुद्धकालमा कमाएका सम्पत्तिलाई वैधानिकता प्रदान गर्न प्रतिस्थापन विधेयक आएको हो ?’ उनले अर्थमन्त्रीलाई प्रश्न गरे ।